تۇركىستاندا ەكى بالاسىن تۇنشىقتىرىپ ولتىرگەن ايەل 15 جىلعا باس بوستاندىعىنان ايىرىلدى. وبلىستىق كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتى 30 جاستاعى كەلىنشەكتى اۋىر قىلمىس جاساعانى ءۇشىن كىنالى دەپ تانىدى، دەپ حابارلايدى «ادىرنا» ءتىلشىسى.
«حاميتقىزى بوتا قىلمىستىق كودەكستىڭ 99-بابى 3-بولىگىمەن كىنالى دەپ تانىلدى. سوت وعان پەداگوگ رەتىندە كامەلەتكە تولماعاندارمەن جۇمىس ىستەۋ سياقتى لاۋازىمدى اتقارۋ قۇقىعىنان ءومىر بويى ايىرا وتىرىپ، 15 جىل مەرزىمگە باس بوستاندىعىنان ايىرۋ جازاسىن تاعايىندادى. حاميتقىزى بوتاعا قاتىستى جازانى قىلمىستىق-اتقارۋ جۇيەسىنىڭ ورتاشا قاۋىپسىز مەكەمەسىندە وتەۋ مەن قولدانىلعان كۇزەتپەن ۇستاۋ بۇلتارتپاۋ شاراسى وزگەرىسسىز قالدىرىلسىن»،— دەدى قىلمىستىق ىستەر جونىندەگى اۋدانارالىق سوتتىڭ سۋدياسى داۋرەن ماداليەۆ.
ەسكە سالايىق، سۇمدىق وقيعا 7 اقپاندا بولعان ەدى. ايىپتالۋشى قىزىلوردا وبلىسى شيەلى اۋدانىنداعى مەكتەپتەردىڭ بىرىندە باستاۋىش سىنىبىنىڭ مۇعالىمى بولىپ جۇمىس ىستەگەن. ايەل جالدامالى پاتەردە 2 جاسار ۇلى مەن 4 جاستاعى قىزىن تۇنشىقتىرىپ ولتىرگەن. ول اۋىر قىلمىستى كۇيەۋىنە رەنجىگەنى ءۇشىن جاساعانىن ايتتى. پوليتسەيلەر كەلىنشەكتى ءبىر كۇننەن كەيىن شىمكەنت قالاسىنداعى قوناقۇيلەردىڭ بىردە ۇستادى. سوت پروتسەسى القا بيلەرىنىڭ قاتىسۋىمەن ءۇش ايداي قارالدى.
