شىمكەنت: كەڭ بابا ساياباعى مەملەكەت مەنشىگىنە قايتارىلۋدا

شىمكەنت قالاسىنىڭ اكىمدىگى كەڭ بابا ساياباعىن مەملەكەت مەنشىگىنە قايتارۋدا بەلسەندى جۇمىستار اتقارۋدا. قازىر بۇل ماسەلە بويىنشا بىرنەشە سوت وتىرىسى ءوتىپ، ناتيجەسىندە شىمكەنت قالالىق سوتىنىڭ ازاماتتىق ىستەر جونىندەگى سوت القاسىنىڭ 2024 جىلعى 10 شىلدەدەگى قاۋلىسىمەن ءبىرىنشى ساتىداعى سوتتىڭ شەشىمى راستالىپ، وزگەرىسسىز قالدى. دەگەنمەن، اكىمدىك تاراپىنان اتقارىلاتىن جۇمىستار كوپ. ەستەرىڭىزگە سالا كەتەيىك، 1999 جىلى شىمكەنت قالاسى اكىمىنىڭ شەشىمىمەن جالپى كولەمى 3,9272 گا جەر تەلىمى «چپكف «ساپار» جشس-نە بالالار ساياباعىنىڭ اۋماعىندا بالالار مەن جاسوسپىرىمدەرگە ەستەتيكالىق جانە مادەني تاربيە بەرۋ ورتالىعىن ۇيىمداستىرۋعا 15 جىلعا دەيىن ۋاقىتشا پايدالانۋعا بەرىلگەن بولاتىن. وكىنىشكە وراي، باستاپقى جوبا ورىندالماي ساياباق از ۋاقىتتا ۇلكەن قوعامدىق تاماقتانۋ الاڭىنا اينالدى. كوممەرتسيالىق پايدالانۋ بارىسىندا عاسىرلار بويعى ەمەن اعاشتارى كەسىلىپ، ساياباقتىڭ كەي اۋماقتارى بەتوندالىپ، پليتكالار توسەلىپ، ۋادە ەتىلگەن بالالار ورتالىعى جاسالمادى. تەگىن ويىن الاڭدارى، اتكەنشەكتەر مەن قۇمسالعىشتار دا قيراتىلدى. ۋاقىت وتە ساياباقتا ساۋدا نىساندارى كوبەيىپ، سانيتارلىق جاعداي ناشارلاپ، ازاماتتاردىڭ نارازىلىعىن تۋعىزدى. قوعامدىق پىكىردى ەسكەرە وتىرىپ، اكىمدىك ساياباقتى مەملەكەت مەنشىگىنە قايتارۋ پروتسەسىن باستادى. سەبەبى، 1999 جىلى بەلگىلەنگەن جالعا بەرۋ مەرزىمى الدەقاشان اياقتالعان بولاتىن. شىمكەنت قالاسىنىڭ باس جوسپارىنا سايكەس كەڭ بابا ساياباعىنىڭ اۋماعى «جاسىل ايماق» بولىپ بەلگىلەنگەن. الايدا، سوت پروتسەسى اياقتالعانشا، بيۋدجەت قاراجاتىن قالاعا تيەسىلى ەمەس نىساندارعا جۇمساۋعا بولمايتىندىقتان، زاڭ شەڭبەرىندە ساياباقتى اباتتاندىرۋ، كوگالداندىرۋ مۇمكىن بولمادى. نىساننىڭ سىن كوتەرمەيتىن جاعدايى ازاماتتاردىڭ ارىز-شاعىمدارىن تۋعىزىپ، ساياباق الەۋمەتتىك مىندەتتەمەلەردى ورىنداي الماعان بيزنەستىڭ الاڭىنا اينالدى. جوعارىدا كورسەتىلگەندەردىڭ نەگىزىندە شىمكەنت قالاسىنىڭ جەر رەسۋرستارىن باسقارۋ دەپارتامەنتى تاراپىنان شىمكەنت قالاسىنىڭ مامانداندىرىلعان اۋدانارالىق ەكونوميكالىق سوتىنا جەر ۋچاسكەسىن بەرۋ جانە كەيىنگى مامىلەلەر تۋرالى شىمكەنت قالاسى اكىمدىگىنىڭ قاۋلىسىنىڭ كۇشىن جويۋ بويىنشا تالاپ ارىز جولداندى. 2024 جىلعى 30 ساۋىردەگى سوت شەشىمىمەن دەپارتامەنتتىڭ تالاپ ارىزى قاناعاتتاندىرىلدى. شىمكەنت قالالىق سوتىنىڭ ازاماتتىق ىستەر جونىندەگى سوت القاسىنىڭ 2024 جىلعى 10 شىلدەدەگى قاۋلىسىمەن ءبىرىنشى ساتىداعى سوتتىڭ شەشىمى وزگەرىسسىز قالدى. وسىلايشا، كەڭ بابا ساياباعى ءىشىنارا مەملەكەت مەنشىگىنە قايتارىلدى. ساياباق مەملەكەت مەنشىگىنە تۇپكىلىكتى قايتارىلعاننان كەيىن اكىمدىك الدىندا جاسىل ايماقتى قالپىنا كەلتىرۋ، تۇرعىنداردىڭ وتباسىلىق سەرۋەنىنە جاعداي جاساۋ مىندەتى تۇر. شىمكەنت قالاسىنىڭ اكىمدىگى قالا تۇرعىندارىنىڭ مۇددەسى ءۇشىن بۇل جوبانى ءساتتى اياقتاپ، كەڭ بابا ساياباعىن قالپىنا كەلتىرۋگە بار كۇش-جىگەرىن سالادى. الايدا، «كريتيكا شىمكەنتا» پاراقشاسى اكىمدىك اتىنا جەكەلەگەن ازاماتتاردىڭ نەگىزسىز ارىز-شاعىمدارىن جاريالاۋدى جالعاستىرۋدا. بۇل ۇستانىم كوپ سۇراق تۋعىزادى. اكىمدىكتىڭ سالالىق قىزمەتكەرلەرىنە قاتىستى قۇقىقتىق، مورالدىق جانە ەستەتيكالىق نەگىزدەمەسى جوق تەرىس مالىمدەمەلەردىڭ نەلىكتەن قولداۋ تاۋىپ وتىرعانى تۇسىنىكسىز. ءبىز ازاماتتاردى تەك رەسمي اقپاراتقا سەنۋگە، تەكسەرىلمەگەن، سەنىمسىز دەرەككوزدەردىڭ ارانداتۋلارىنا جول بەرمەۋگە شاقىرامىز. شىمكەنت قالاسى اكىمدىگىنىڭ Instagram, Facebook جەلىلەرىندەگى رەسمي پاراقشالارىندا قالانىڭ دامۋىنا قاتىستى بارلىق جاڭالىقتار جاريالانادى. كەز كەلگەن پروبلەمالىق سۇراقتار مەن شاعىمداردى Ikomek سەرۆيسىنە، قالا اكىمدىگىنىڭ پاراقشالارىنا جولداۋلارىڭىزدى سۇرايمىز.