- بيىل ءبىز بۇل باعىتتا ەكى وقۋ ورنىمەن ارىپتەستىكتى باستادىق. اتاپ ايتقاندا، بۇل –ورتا مەكتەپتەرگە ەنگىزىلەتىن بارلىق كۋرستى دايىنداپ، ىقشامدايتىن ىبىراي التىنسارين اتىنداعى ۇلتتىق ءبىلىم بەرۋ اكادەمياسى. سونىمەن قاتار نازارباەۆ زياتكەرلىك مەكتەبى. بۇل ارادا قانداي دا ءبىر جەكە ءپان بولمايدى. وعان بولەك ساعاتتار بولىنبەيدى. جاراتىلىستانۋ، بيولوگيا سياقتى جالپى پاندەرگە تاقىرىپ رەتىندە اراسىندا ەنگىزىلەدى، - دەدى بۇۇ-نىڭ حالىقتى ورنالاستىرۋ قورىنىڭ (يۋنفپا) اتقارۋشى وكىلى رايىمبەك سيسەماليەۆ.

2019 جىلدىڭ جاز ايىندا مۇعالىمدەر پيلوتتىق مەكتەپتەردە دايىندىق كۋرسىنان وتكەن. مۇنداي وزگەرىس 2019-2020 وقۋ جىلىندا سىناققا الىنباق ەكەن. ودان كەيىن بارىپ، ول بارلىق مەكتەپتەردە ەنگىزىلەتىن بولادى.

پيلوتتىق جوبا بيىل 9-سىنىپتان باستاپ قولعا الىنباق. ودان كەيىن ول 8-6-سىنىپتار وقيتىن پاندەرگە ەنگىزىلەدى. بارلىق اقپارات بالالاردىڭ جاس ەرەكشەلىكتەرىنە سايكەس ۇسىنىلادى.

ايتا كەتسەك، جىنىستىق تاربيە كۋرستارى قازاقستان مەكتەپتەرىندە سوڭعى بەس جىلدا اراكىدىك كورىنىس تاۋىپ ءجۇر. كوبىنە قالالىق سالاۋاتتى ءومىر سالتىن قالىپتاستىرۋ ورتالىعى سىندى مەكەمەلەردەن مامانداردان كەلىپ، مەكتەپكە بۋكلەت تاراتىپ، ءوز دارىستەرىن وقىپ كەتىپ جۇرگەن. سونىڭ ىشىندە مۇشەقاپتىڭ جارناماسى جاقسى جۇرگىزىلەدى. ماسەلەن، الماتىداعى ءبىر مەكتەپتىڭ اتا-انالارى بىرەر جىل بۇرىن بۇعان ۇدەرە تۇرەگەلىپ، ءوز نارازىلىعىن ءبىلدىرىپ، ءبىلىم مينيسترلىگىن اياعىنان تىك تۇرعىزعان. ولارعا بالالارىنىڭ قولىنا ۇستاتقان تەست سۇراقتارى دا توبە شاشىن تىك تۇرعىزعان. اسىرەسە، قازاق مەكتەپتەرىندەگى كوپ اتا-انا جىنىستىق تاربيەدەن گورى، ءوز مەنتاليتەتىمىزگە ساي "ادەپ" دەگەن ساباقتى ەنگىزگەن ءجون عوي دەپ ەسەپتەيدى.