تامىزدىڭ 21-22 كۇندەرى پاۆلودار قالاسىندا وتكەن «ASAR» III رەسپۋبليكالىق فورۋمىنا جامبىل وبلىسىنىڭ ۇكىمەتتىك ەمەس ۇيىمدارىنىڭ وكىلدەرى قاتىستى، دەپ حابارلايدى adyrna.kz ۇلتتىق پورتالى. اتالعان جيىن ۇەۇ-بيزنەس-مەملەكەتتىڭ ۇشجاقتى ىنتىماقتاستىعىنىڭ «الەۋمەتتىك يننوۆاتسيالار: وڭىرلىك دامۋ جەتىستىگىنىڭ فورمۋلاسى» تاقىرىبىندا ءوتتى.
وبلىس اكىمدىگى ىشكى ساياسات باسقارماسىنىڭ ازاماتتىق قوعام ينستيتۋتتارىمەن جۇمىس ءبولىمىنىڭ باسشىسى ماقپال دوسىمبەكوۆانىڭ ايتۋىنشا، وبلىستان فورۋمعا 4 ۇيىم مەن 2 مەملەكەتتىك قىزمەتكەر قاتىسقان. ولاردىڭ ىشىندە «وسۆوبوجدەنيە-يۋگ» قوعامدىق قورىنىڭ پرەزيدەنتى داۋرەن باعجانوۆ, جامبىل وبلىسى جاستار ۇيىمدارىنىڭ قاۋىمداستىعى" زاڭدى تۇلعالاردىڭ بىرلەستىگىنىڭ پرەزيدەنتى يسلامبەك داستان، «اياۋلى الاقان جىلۋى» مۇگەدەكتەر بىرلەستىگىنىڭ باس ديرەكتورى اسەل داۋىلباەۆا جانە "نۇر قايىرىم" مق قوعامدىق بىرلەستىگى توراعاسى ءابدىماجيت ابساتتاروۆ بار.
– ۇشجاقتى ىنتىماقتاستىق جاسالاتىن ASAR رەسپۋبليكالىق فورۋمى بيىل ءداستۇرلى تۇردە ءۇشىنشى رەت ۇيىمداستىرىلىپ وتىر. قر اقپارات جانە قوعامدىق دامۋ مينيسترلىگى ۇيىمداستىرعان جيىنعا كاسىپكەرلەر مەن مەملەكەتتىك قىزمەتكەرلەر جانە ۇكىمەتتىك ەمەس ۇيىمداردىڭ وكىلدەرى قاتىستى. فورۋمنىڭ باستى ماقساتى جەرگىلىكتى قوعامدىق ۇيىمداردىڭ الەۋمەتتىك جانە ازاماتتىق باستامالاردى دامىتۋعا قوسقان ۇلەسىن انىقتاپ، دامىتۋ بولىپ سانالادى. الدىن الا مينيسترلىك ونلاين ارقىلى ۇەۇ-دىڭ الەۋمەتتىك جوبالارىن جيناستىرىپ، كاسىپكەرلەرگە ۇسىنادى. ەگەر كاسىپكەرگە قاندايدا ءبىر جوبا ۇناسا، فورۋم اياسىندا ونى جۇزەگە اسىرۋ ءۇشىن كەلىسىم-شارت جاسالاتىن بولادى. ماسەلەن بىلتىر تالدىقورعاندا وبلىسىمىزدىڭ «ناقتى كومەك» ۇكىمەتتىك ەمەس ۇيىمىنىڭ جەتەكشىسى شولپان احمەتوۆا الەۋمەتتىك گرانتتى جەڭىپ اعان بولاتىن. شولپان داۋكەنقىزى مۇمكىندىگى شەكتەۋلى جانداردى تىگىن مەن توقىما سياقتى قولونەر جۇمىستارىنا باۋلىپ، ارى قاراي جۇمىسپەن قامتيتىن جوبا ۇسىندى. ءبىز الماتى قالاسىنان ينۆەستور تاۋىپ، كاسىپكەر مەن «كومەك» ۇيىمىنىڭ اراسىندا مەموراندۋمعا قول قويۋعا ىقپال ەتتىك، – دەيدى ول.
پاۆلودار وبلىسىندا وتكەن فورۋمدا كاسىپكەر مەن ۇكىمەتتىك ەمەس ۇيىمدار اراسىندا كەلىسىم-شارتتار جاسالىپ، اۋقىمدى جوبالار قولعا الىندى. ماقپال دوسىمبەكوۆانىڭ ايتۋىنشا، جامبىل وبلىستىق ىشكى ساياسات باسقارماسى الەۋمەتتىك كاسىپكەرلىكتى دامىتۋعا ايرىقشا كوڭىل ءبولىپ وتىر. مىسالى وتكەن جىلى ءوڭىردى دامىتۋ بويىنشا 5 شاعىن گرانتتار بەرىلسە، بۇل يگى ءىس بيىلدا جالعاسىن تاباتىن بولادى.
ەڭ العاشقى ASAR فورۋمى اتىراۋ جانە تالدىقورعان قالالارىندا وتكەن بولاتىن. فورۋمنىڭ ەرەجەسىنە سايكەس جيىن ءار جىلى ءار وڭىردە وتەدى. بيىل جيىنعا قاتىسۋشىلار ەندىگى فورۋم وڭتۇستىك وڭىرلەردە ۇيىمداستىرىلسا دەگەن ءوتىنىش ايتتى.
"ادىرنا"
ۇلتتىق پورتالى
