7-8 قازان كۇندەرى رەسەي استاناسى ماسكەۋدە تمد ەلدەرى باسشىلارىنىڭ كەزەكتى كەڭەسى وتەدى. كوشباسشىلار تمد شەڭبەرىندەگى ءوزارا ءىس-قيمىل تۋرالى پىكىر الماسىپ، 2025 جىلى ۇيىمعا كىمنىڭ توراعالىق ەتەتىنىن انىقتايدى، دەپ حابارلايدى «ادىرنا» ءتىلشىسى 24.kg-گە سىلتەمە جاساپ.
مەملەكەت باسشىلارى الداعى 3 جىلعا دوستاستىقتىڭ مادەني استانالارىن جاريالاۋ تۋرالى شەشىمگە قول قويىپ، قۇقىقتىق ءوزارا ءىس-قيمىل مەن قاۋىپسىزدىكتى قامتاماسىز ەتۋگە قاتىستى بىرقاتار قۇجاتقا تۇزەتۋ ەنگىزبەك.
بۇل كەزدەسۋ رەسەي پرەزيدەنتى ۆلاديمير ءپۋتيننىڭ تۋعان كۇنىمەن تۇسپا-تۇس كەلىپ وتىر. بۇگىن كورشى ەل باسشىسى 72 جاسقا تولدى. ازىرگە تاجىكستان، قىرعىزستان جانە وزبەكستان پرەزيدەنتتەرى ماسكەۋگە باردى. سونداي-اق كەزدەسۋگە قازاقستان، ءازىربايجان، تۇرىكمەنستان، ارمەنيا مەن بەلارۋس باسشىلارى دا قاتىسادى دەپ كۇتىلىپ وتىر.
«ەج» Telegram ارناسى بۇگىن پرەزيدەنت قاسىم-جومارت توقاەۆتىڭ اەس قۇرىلىسى بويىنشا رەفەرەندۋم ناتيجەلەرىنە باسا نازار اۋداراتىنىن مالىمدەدى.
«مەملەكەت باسشىسى رەفەرەندۋم قورىتىندىسىن شىعارىپ، قازاقستان حالقىنا ۇندەۋ جاساماق. كۇن تارتىبىندە جۇمىس ساپارىمەن رەسەيگە بارۋ جوسپارى جوق. الايدا سيتۋاتسياعا بايلانىستى شەشىم ەرتەڭ قابىلدانادى»،—دەپ جازدى ارنا قازاقستان پرەزيدەنتى اكىمشىلىگىندەگى دەرەككوزگە سىلتەمە جاساپ.
اقوردانىڭ ءباسپاسوز قىزمەتى قاسىم-جومارت توقاەۆتىڭ بۇگىن رەسەي فەدەراتسياسىنىڭ پرەزيدەنتى ۆلاديمير پۋتينگە قۇتتىقتاۋ جەدەلحاتىن جولداعانىن حابارلادى.
