رامىزدەردى قۇرمەتتەۋ — ءاربىر ازاماتتىڭ بورىشى

مەملەكەتىمىزدىڭ سيمۆولىنا اينالعان رامىزدەر العاش رەت 1992 جىلى رەسمي تۇردە بەكىتىلدى. سودان بەرى ءتورتىنشى ماۋسىمدا ەلىمىزدە قازاقستان رەسپۋبليكاسى مەملەكەتتىك رامىزدەر كۇنى اتاپ وتىلەدى. بۇل كۇندە اسقاقتىقتىڭ بەلگىسى سانالاتىن تۋ، ەركىندىكتىڭ جارشىسى – ەلتاڭبا، ءار ءسوزى جىگەرگە تولى – ءانۇران تاۋەلسىزدىكتىڭ نىشانىنا اينالدى. وسىنداي ۇلتتىق رۋحتى وياتىپ، جىگەرلەندىرەتىن رامىزدەرىمىزدى قورعاۋ، قاستەرلەۋ بارشامىزعا مىندەت. قازاقستان رەسپۋبليكاسىنىڭ رامىزدەرى – ەلدىڭ تاۋەلسىزدىگىن، تاريحىن، مادەنيەتىن، جانە بىرلىگىن بەينەلەيتىن ماڭىزدى ۇلتتىق نىشاندار. ءاربىر ءرامىزدىڭ وزىنە ءتان ەرەكشەلىگى مەن ماعىناسى بار، ولار ەلىمىزدىڭ بولاشاعى ءۇشىن ەرەكشە ورىن الادى. رامىزدەردى قورعاۋ جانە ولاردى قۇرمەتتەۋ – ءاربىر ازاماتتىڭ قاسيەتتى بورىشى. قوعامدا رامىزدەردى ناسيحاتتاۋ ارقىلى، اسىرەسە جاس بۋىنعا ولاردىڭ ماڭىزىن ءتۇسىندىرىپ، قۇرمەت سەزىمىن قالىپتاستىرۋ قاجەت. بۇل ءىس-شارالار مەكتەپتەردە، ۋنيۆەرسيتەتتەردە جانە مەملەكەتتىك مەرەكەلەردە وتكىزىلسە، رامىزدەرگە دەگەن قۇرمەت تەرەڭدەي تۇسەدى. الەۋمەتتىك جەلىلەردە جانە بۇقارالىق اقپارات قۇرالدارىندا دا رامىزدەردىڭ ماڭىزىن تۇسىندىرەتىن شارالار وتكىزۋ بۇل ءىستىڭ ءتيىمدى جولدارىنىڭ ءبىرى. 2023 جىلى مەملەكەتتىك رامىزدەردى ناسيحاتتاۋ اياسىندا ءتۇرلى ءىس-شارالار ءوتتى. سولاردىڭ ءبىرى – ەلىمىزدىڭ ءار ايماعىندا وتكەن «مەنىڭ قازاقستانىم» پاتريوتتىق فورۋمى.  جاستار اراسىندا ءپاتريوتيزمدى دامىتۋعا جانە رامىزدەرگە قۇرمەتتى ارتتىرۋعا باعىتتالعان ءىس-شاراعا قوعام قايراتكەرلەرى، بەلگىلى تۇلعالار جانە جاستار ۇيىمدارىنىڭ وكىلدەرى قاتىستى. سونداي-اق، ءتۇرلى دەڭگەيدەگى ءبىلىم بەرۋ مەكەمەلەرىندە رامىزدەرگە قاتىستى اقپاراتتىق ساباقتار وتكىزىلدى. وقۋشىلارعا مەملەكەتتىك تۋ، ەلتاڭبا جانە ءانۇراننىڭ ءمان-ماعىناسى ءتۇسىندىرىلىپ، ارنايى ۆيكتورينالار مەن كونكۋرستار ۇيىمداستىرىلدى. مەملەكەتتىك رامىزدەرگە ارنالعان شىعارماشىلىق بايقاۋلارمەن قاتار  رامىزدەردى قۇرمەتتەۋگە شاقىراتىن جاستار ۇيىمدارى مەن قوعامدىق بىرلەستىكتەر ۇيىمداستىرعان فلەشموبتار وتكىزىلدى. مۇنداي ءىس-شارالار رامىزدەردى ناسيحاتتاپ قانا قويماي، ولاردى قورعاۋ ءتارتىبىن دە تۇسىندىرەدى. قازاقستان رەسپۋبليكاسىنىڭ زاڭناماسىندا رامىزدەردى دۇرىس پايدالانۋ مەن قورعاۋ ءتارتىبى ناقتى بەلگىلەنگەن. مەملەكەتتىك رامىزدەردى زاڭسىز پايدالانۋ نەمەسە ولارعا قۇرمەتسىزدىك كورسەتۋ قاتاڭ جاۋاپكەرشىلىككە تارتىلادى. قازاقستان رەسپۋبليكاسىنىڭ كونستيتۋتسياسىنا سايكەس ءاربىر ازامات مەملەكەتتىك رامىزدەردى قۇرمەتتەۋگە مىندەتتى. اكىمشىلىك قۇقىق بۇزۋشىلىق تۋرالى قازاقستان رەسپۋبليكاسىنىڭ كودەكسى 458-باپ بويىنشا مەملەكەتتىك رامىزدەردى قورلاۋ نەمەسە دۇرىس پايدالانباۋ، رامىزدەرگە قاتىستى قۇرمەتسىزدىك كورسەتۋ، ولاردى بۇزۋعا جول بەرمەۋ جونىندەگى تالاپتاردى بۇزۋ اكىمشىلىك قۇقىق بۇزۋشىلىق بولىپ تابىلادى. ونى بۇزعان جاعدايدا جەكە تۇلعالارعا 200 اەك-كە دەيىنگى ايىپپۇل سالىنادى. رامىزدەردى قوعامدىق ورىنداردا قورلاعان جاعدايدا ءۇش جىلعا دەيىن باس بوستاندىعىنان ايىرۋ نەمەسە ايىپپۇل سالىنادى. بۇل زاڭدار مەملەكەتتىك رامىزدەرگە قۇرمەت كورسەتۋدى جانە ولاردى دۇرىس قولدانۋدى قامتاماسىز ەتەدى. ال رامىزدەرگە زيان كەلتىرگەندەرگە ايىپپۇلدان باستاپ، قىلمىستىق جازاعا دەيىنگى شارالار قاراستىرىلعان. رامىزدەردى قورعاۋ – ءاربىر ازاماتتىڭ پارىزى. بۇل تەك قانا زاڭدىق تالاپ ەمەس، ۇلتتىق رۋحتى كوتەرەتىن ماڭىزدى ءىس-شارا، ءار ازاماتتىڭ ار-وجدانىنا بايلانىستى ءىس. بۇل – ەلدىڭ ابىرويىن قورعاۋ. ولاردى قورعاي وتىرىپ، ءبىز ءوز مادەنيەتىمىزدى، تاريحىمىزدى جانە ۇلتتىق بىرەگەيلىگىمىزدى ساقتايمىز. جاستار اراسىندا رامىزدەردى قۇرمەتتەۋدى ناسيحاتتاۋ جانە ولاردىڭ ماڭىزىن ءتۇسىندىرۋ – بولاشاق ۇرپاقتىڭ ەلگە دەگەن سۇيىسپەنشىلىگىن ارتتىرۋعا باعىتتالعان ماڭىزدى قادام. مەملەكەتتىك رامىزدەردى دۇرىس پايدالانۋ جانە قورعاۋ – ەلدىڭ ىشكى تۇتاستىعىن ساقتاۋدىڭ نەگىزى. قوعامدا رامىزدەرگە دەگەن قۇرمەتتى ارتتىرۋ، اسىرەسە، جاستار اراسىندا، پاتريوتتىق سەزىمدەردى دامىتۋعا ىقپال ەتەدى. سوندىقتان ءاربىر ازامات رامىزدەرگە دەگەن قۇرمەتىن كۇندەلىكتى ومىردە كورسەتە وتىرىپ، بولاشاق ۇرپاققا تاۋەلسىزدىكتىڭ ماڭىزىن ناسيحاتتاۋى قاجەت. رامىزدەردى تەك ءبىر كوركەمدىك بەلگى رەتىندە ەمەس، ۇلتتىق بىرلىكتىڭ نىشانى رەتىندە قابىلداۋ ماڭىزدى. وسىلايشا، ءاربىر قازاقستاندىق ءوز رامىزدەرىن قورعاي وتىرىپ، ەلدىڭ ابىرويىن اسقاقتاتادى. ەلىمىزدىڭ تاۋەلسىزدىگىن ايقىندايتىن ۇلتتىق ماقتانىشتىڭ كورىنىسى سانالاتىن رامىزدەر تەرەڭ ماعىناعا يە، ولار حالىقتىڭ بىرلىگىن، تاۋەلسىزدىككە جەتۋ جولىن جانە ۇلتتىڭ بولاشاققا دەگەن سەنىمىن بەينەلەيدى. حالىقارالىق ارەنالاردا ەلىمىزدىڭ نامىسىن قورعايتىن سپورتشىلارىمىز بەن ءبىلىم بايگەسىندە باق سىنايتىن ءاربىر قازاقستاندىق كوك تۋىمىزدى جەلبىرەتىپ، ءانۇرانىمىزدى شىرقاتۋ ماقساتىندا بار كۇشتەرىن سالاتىنى انىق.