Rämızderdı qūrmetteu — ärbır azamattyŋ boryşy

Memleketımızdıŋ simvolyna ainalǧan rämızder alǧaş ret 1992 jyly resmi türde bekıtıldı. Sodan berı törtınşı mausymda elımızde Qazaqstan Respublikasy memlekettık rämızder künı atap ötıledı. Būl künde asqaqtyqtyŋ belgısı sanalatyn tu, erkındıktıŋ jarşysy – eltaŋba, är sözı jıgerge toly – änūran täuelsızdıktıŋ nyşanyna ainaldy. Osyndai ūlttyq ruhty oiatyp, jıgerlendıretın rämızderımızdı qorǧau, qasterleu barşamyzǧa mındet. Qazaqstan Respublikasynyŋ rämızderı – eldıŋ täuelsızdıgın, tarihyn, mädenietın, jäne bırlıgın beineleitın maŋyzdy ūlttyq nyşandar. Ärbır rämızdıŋ özıne tän erekşelıgı men maǧynasy bar, olar elımızdıŋ bolaşaǧy üşın erekşe oryn alady. Rämızderdı qorǧau jäne olardy qūrmetteu – ärbır azamattyŋ qasiettı boryşy. Qoǧamda rämızderdı nasihattau arqyly, äsırese jas buynǧa olardyŋ maŋyzyn tüsındırıp, qūrmet sezımın qalyptastyru qajet. Būl ıs-şaralar mektepterde, universitetterde jäne memlekettık merekelerde ötkızılse, rämızderge degen qūrmet tereŋdei tüsedı. Äleumettık jelılerde jäne būqaralyq aqparat qūraldarynda da rämızderdıŋ maŋyzyn tüsındıretın şaralar ötkızu būl ıstıŋ tiımdı joldarynyŋ bırı. 2023 jyly memlekettık rämızderdı nasihattau aiasynda türlı ıs-şaralar öttı. Solardyŋ bırı – elımızdıŋ är aimaǧynda ötken «Menıŋ Qazaqstanym» patriottyq forumy.  Jastar arasynda patriotizmdı damytuǧa jäne rämızderge qūrmettı arttyruǧa baǧyttalǧan ıs-şaraǧa qoǧam qairatkerlerı, belgılı tūlǧalar jäne jastar ūiymdarynyŋ ökılderı qatysty. Sondai-aq, türlı deŋgeidegı bılım beru mekemelerınde rämızderge qatysty aqparattyq sabaqtar ötkızıldı. Oquşylarǧa memlekettık tu, eltaŋba jäne änūrannyŋ män-maǧynasy tüsındırılıp, arnaiy viktorinalar men konkurstar ūiymdastyryldy. Memlekettık rämızderge arnalǧan şyǧarmaşylyq baiqaularmen qatar  rämızderdı qūrmetteuge şaqyratyn jastar ūiymdary men qoǧamdyq bırlestıkter ūiymdastyrǧan fleşmobtar ötkızıldı. Mūndai ıs-şaralar rämızderdı nasihattap qana qoimai, olardy qorǧau tärtıbın de tüsındıredı. Qazaqstan Respublikasynyŋ zaŋnamasynda rämızderdı dūrys paidalanu men qorǧau tärtıbı naqty belgılengen. Memlekettık rämızderdı zaŋsyz paidalanu nemese olarǧa qūrmetsızdık körsetu qataŋ jauapkerşılıkke tartylady. Qazaqstan Respublikasynyŋ Konstitusiiasyna säikes ärbır azamat memlekettık rämızderdı qūrmetteuge mındettı. Äkımşılık qūqyq būzuşylyq turaly Qazaqstan Respublikasynyŋ Kodeksı 458-bap boiynşa memlekettık rämızderdı qorlau nemese dūrys paidalanbau, rämızderge qatysty qūrmetsızdık körsetu, olardy būzuǧa jol bermeu jönındegı talaptardy būzu äkımşılık qūqyq būzuşylyq bolyp tabylady. Ony būzǧan jaǧdaida jeke tūlǧalarǧa 200 AEK-ke deiıngı aiyppūl salynady. Rämızderdı qoǧamdyq oryndarda qorlaǧan jaǧdaida üş jylǧa deiın bas bostandyǧynan aiyru nemese aiyppūl salynady. Būl zaŋdar memlekettık rämızderge qūrmet körsetudı jäne olardy dūrys qoldanudy qamtamasyz etedı. Al rämızderge ziian keltırgenderge aiyppūldan bastap, qylmystyq jazaǧa deiıngı şaralar qarastyrylǧan. Rämızderdı qorǧau – ärbır azamattyŋ paryzy. Būl tek qana zaŋdyq talap emes, ūlttyq ruhty köteretın maŋyzdy ıs-şara, är azamattyŋ ar-ojdanyna bailanysty ıs. Būl – eldıŋ abyroiyn qorǧau. Olardy qorǧai otyryp, bız öz mädenietımızdı, tarihymyzdy jäne ūlttyq bıregeilıgımızdı saqtaimyz. Jastar arasynda rämızderdı qūrmetteudı nasihattau jäne olardyŋ maŋyzyn tüsındıru – bolaşaq ūrpaqtyŋ elge degen süiıspenşılıgın arttyruǧa baǧyttalǧan maŋyzdy qadam. Memlekettık rämızderdı dūrys paidalanu jäne qorǧau – eldıŋ ışkı tūtastyǧyn saqtaudyŋ negızı. Qoǧamda rämızderge degen qūrmettı arttyru, äsırese, jastar arasynda, patriottyq sezımderdı damytuǧa yqpal etedı. Sondyqtan ärbır azamat rämızderge degen qūrmetın kündelıktı ömırde körsete otyryp, bolaşaq ūrpaqqa täuelsızdıktıŋ maŋyzyn nasihattauy qajet. Rämızderdı tek bır körkemdık belgı retınde emes, ūlttyq bırlıktıŋ nyşany retınde qabyldau maŋyzdy. Osylaişa, ärbır qazaqstandyq öz rämızderın qorǧai otyryp, eldıŋ abyroiyn asqaqtatady. Elımızdıŋ täuelsızdıgın aiqyndaityn ūlttyq maqtanyştyŋ körınısı sanalatyn rämızder tereŋ maǧynaǧa ie, olar halyqtyŋ bırlıgın, täuelsızdıkke jetu jolyn jäne ūlttyŋ bolaşaqqa degen senımın beineleidı. Halyqaralyq arenalarda elımızdıŋ namysyn qorǧaityn sportşylarymyz ben bılım bäigesınde baq synaityn ärbır qazaqstandyq kök tuymyzdy jelbıretıp, änūranymyzdy şyrqatu maqsatynda bar küşterın salatyny anyq.