جەزدى قالا جەتپىستىڭ اسقارىندا

ۇلىتاۋ وبلىسىنىڭ اكىمشىلىك ورتالىعى - جەزقازعان قالاسىنىڭ قۇرىلعانىنا 70 جىل. ايرىقشا مەرەيتوي قۇرمەتىنە وراي مىستى ءوڭىر تورىندە ورنالاسقان سەركە قوجامقۇلوۆ اتىنداعى قازاق مۋزىكالىق-دراما تەاترىندا سالتاناتتى ءىس-شارا ءوتتى. جيىندا ۇلىتاۋ وبلىسىنىڭ اكىمى بەرىك ابدىعاليۇلى تۇرعىندار مەن قالا قوناقتارىنا قۇتتىقتاۋىن جەتكىزدى. «جىل سايىن قالا مەرەكەسى اتالىپ وتكەندە ءبىز قازىنالى قارساقباي مەن بايقوڭىر كومىر وشاعىن، ۇلكەن جەزقازعان جۇمىسشى كەنتىنىڭ تىرلىگى مەن جەزدىنىڭ تاريحي ورىنىن ۇنەمى ەسكە الىپ وتىرامىز. ويتكەنى قارساقبايدىڭ قارا مىسى مەن جەزدىنىڭ مارگانەتسى، بايقوڭىردىڭ كومىرى مەن جەزقازعاننىڭ سارى مىسى – ۇلىتاۋ دالاسىنىڭ ءوندىرىستى ايماققا اينالۋىنىڭ وزەگى. بۇل – ءبىر-بىرىنەن ءبولىپ قاراۋعا بولمايتىن تۇتاس ۇعىم. جاڭادان اشىلعان ۇلىتاۋ وبلىسىنىڭ ورتالىعى جەزقازعان مەن جەزقازعاندىقتاردىڭ وسى مىندەتتى ورىنداۋداعى ءرولى دە ەرەكشە بولماق. ويتكەنى جەزقازعان – وتانىمىزدىڭ ءتۇستى مەتاللۋرگياسىنىڭ ءىرى وشاعى، قۋاتتى ورتالىعى. ءوزىنىڭ 70 جىلدىق دامۋ جولىندا جەزقازعان قالاسى تاريح تولقىنىنىڭ نەبىر اۋىر سىندارىنان ءوتتى، ءوندىرىستى دامىتۋدىڭ قيىن دا كۇردەلى سىناقتارىن باستان كەشىردى. ءبارىن دە ءتۇسىنىپ، بىرىنە بەل بۋعان كەنشىلەر مەن مەتاللۋرگتەردىڭ، قۇرىلىسشىلار مەن بايىتۋشىلاردىڭ ەرلىك ۇلگىسى قالىپتاستى. بۇگىنگى جەزقازعاندىقتاردىڭ بويىندا سول ورشىلدىك بار. قانىش ساتباەۆ ەسىمى مەن جەزقازعان اتاۋى قاتار ايتىلادى. بيىل عۇلاما عالىم قانىش يمانتايۇلى ساتباەۆتىڭ تۋعانىنا 125 جىل تولدى. باياناۋىلدا تۋىپ، ۇلىتاۋدا ازامات بولىپ قالىپتاسقان عالىمنىڭ تويىمەن ورايلاس كەلگەن جەزقازعاننىڭ 70 جىلدىق تورقالى تويى قۇتتى بولسىن»-دەدى ءوڭىر باسشىسى ءوز قۇتتىقتاۋىندا.