Jezdı qala jetpıstıŋ asqarynda

Ūlytau oblysynyŋ äkımşılık ortalyǧy - Jezqazǧan qalasynyŋ qūrylǧanyna 70 jyl. Airyqşa mereitoi qūrmetıne orai mysty öŋır törınde ornalasqan Serke Qojamqūlov atyndaǧy qazaq muzykalyq-drama teatrynda saltanatty ıs-şara öttı. Jiynda Ūlytau oblysynyŋ äkımı Berık Äbdıǧaliūly tūrǧyndar men qala qonaqtaryna qūttyqtauyn jetkızdı. «Jyl saiyn qala merekesı atalyp ötkende bız qazynaly Qarsaqbai men Baiqoŋyr kömır oşaǧyn, Ülken Jezqazǧan jūmysşy kentınıŋ tırlıgı men Jezdınıŋ tarihi orynyn ünemı eske alyp otyramyz. Öitkenı Qarsaqbaidyŋ qara mysy men Jezdınıŋ marganesı, Baiqoŋyrdyŋ kömırı men Jezqazǧannyŋ sary mysy – Ūlytau dalasynyŋ öndırıstı aimaqqa ainaluynyŋ özegı. Būl – bır-bırınen bölıp qarauǧa bolmaityn tūtas ūǧym. Jaŋadan aşylǧan Ūlytau oblysynyŋ ortalyǧy Jezqazǧan men jezqazǧandyqtardyŋ osy mındettı oryndaudaǧy rölı de erekşe bolmaq. Öitkenı Jezqazǧan – Otanymyzdyŋ tüstı metallurgiiasynyŋ ırı oşaǧy, quatty ortalyǧy. Özınıŋ 70 jyldyq damu jolynda Jezqazǧan qalasy tarih tolqynynyŋ nebır auyr syndarynan öttı, öndırıstı damytudyŋ qiyn da kürdelı synaqtaryn bastan keşırdı. Bärın de tüsınıp, bırıne bel buǧan kenşıler men metallurgterdıŋ, qūrylysşylar men baiytuşylardyŋ erlık ülgısı qalyptasty. Bügıngı jezqazǧandyqtardyŋ boiynda sol örşıldık bar. Qanyş Sätbaev esımı men Jezqazǧan atauy qatar aitylady. Biyl ǧūlama ǧalym Qanyş İmantaiūly Sätbaevtyŋ tuǧanyna 125 jyl toldy. Baianauylda tuyp, Ūlytauda azamat bolyp qalyptasqan ǧalymnyŋ toiymen orailas kelgen Jezqazǧannyŋ 70 jyldyq torqaly toiy qūtty bolsyn»-dedı öŋır basşysy öz qūttyqtauynda.