مەملەكەت باسشىسى قاسىم-جومارت توقاەۆتىڭ 2020 جىلدى ەرىكتىلەر جىلى دەپ جاريالاعانى وتە ماڭىزدى شەشىم بولدى. بۇل تۋرالى جامبىل وبلىستىق «قىزىل اي» قوعامىنىڭ ديرەكتورى ورازكۇل تاستەمىروۆا مالىمدەدى، دەپ حابارلايدى adyrna.kz ۇلتتىق پورتالى.
ورازكۇل تويبەكقىزىنىڭ ايتۋىنشا، قوعامدىق ۇيىمنىڭ جۇمىسىنىڭ جاندانۋىنا ەرىكتىلەر كوپ ۇلەس قوسادى. سوندىقتان دا ول پرەزيدەنتتىڭ كەلەر جىلدى ەرىكتىلەر جىلى دەپ جاريالاۋى قوعامدىق ۇيىمداردىڭ بويىنا قان جۇگىرتەدى دەپ ەسەپتەيدى.
– «قازاقتا اپات ايتىپ كەلمەيدى» دەگەن قاناتتى ءسوز بار. راسىندا ەلىمىزدە ءارتۇرلى وقىس وقيعالار بولىپ، سونىڭ سالدارىنان قاراپايىم حالىق كومەككە مۇقتاج بولىپ جاتادى. ماسەلەن، كۇنى كەشە ارىس قالاسى بومبانىڭ استىندا قالعاندا ەرىكتىلەر اياعىنان تىك تۇرىپ، ەل بىرلىگىن پاش ەتتى. ايتسە دە، ءبىزدىڭ ەلدە ەرىكتىلەرگە ءالى دە بولسا ءتيىستى دەڭگەيدە كوڭىل بولىنبەي وتىر. مەنىڭ ويىمشا، پرەزيدەنتتىڭ ەرىكتىلەرگە بايلانىستى شەشىمى ءبىزدىڭ ەلدە كەنجەلەپ قالعان سالانىڭ بويىنا قان جۇگىرتەدى دەپ ەسەپتەيمىن. شىن مانىسىندە ءبىزدىڭ جۇمىسىمىزدىڭ جاندانۋى ەرىكتىلەرگە تىكەلەي بايلانىستى. وكىنىشكە قاراي ءبىزدىڭ قوعامدىق ۇيىمعا ەرىكتىلەر كوپ كەلىپ جاتقان جوق. مەكتەپ پەن كوللەدج جانە ۋنيۆەرسيەتتەر دە جيىن وتكىزىپ، «توتەنشە جاعداي بولعان كەزدە نە ىستەۋ كەرەك» دەگەن تاقىرىپتا ترەنيگتەر وتكىزەمىز. سول جيىنداردا جاستاردى قوعامدىق ۇيىمنىڭ جۇمىسىنا اتسالىسۋعا شاقىرىپ جاتامىز. ولاردىڭ ىشىندە ءبىزدىڭ ۇسىنىسىزدى قابىل الاتىندار بار. ءبىراز از، – دەيدى ول.
«قىزىل اي» قوعامدىق ۇيىمى وت پەن سۋدىڭ ورتاسىندا جۇرەدى. ماسەلەن، ارىس قالاسىنىڭ حالقى قيىن جاعدايعا تاپ بولعان دا، ەڭ ءبىرىنشى بولىپ وسى ۇيىم كومەك قولىن سوزعان. سونداي-اق، ول قوعامدىق ۇيىمنىڭ بالالارعا ايرىقشا قامقورلىق جاسايتىنىن ايتادى.
– مەركى اۋدانىنداعى «جۇلدىز» لاگەرىندە ارىس قالاسىنان 50 بالا كەلىپ، دەمالىپ قايتتى. «ارايسترويماركەت» جشس دەمەۋشىلىگىنىڭ ارقاسىندا ارىستىق بالالارعا اياق كيىم مەن فۋتبولكا سەكىلدى كيىم-كەشەك بەرىپ، كوڭىلىن كوتەردىك. «نەكە جانە جانۇيا» كلينيكاسىنىڭ جانىنداعى ءۇي جارىلعاندا، ودان زارداپ شەككەندەرگە كومەكتەستىك. ناقتىراق ايتسام، «حلەبنىي دار» ناۋبايحاناسىنا وتىنىشپەن شىعىپ، تۇرعىنداردى نانمەن قامتاماسىز ەتتىك. بۇدان بولەك، «مەكتەپكە جول» اكتسياسىنا قولداۋ كورسەتىپ، كوپ بالالى جانە اسىراۋشىسى جوق 22 بالانىڭ وقۋ قۇرالدارىن ساتىپ الىپ بەردىك. بۇعان بىزگە «كەرەگە» جانە «ادەكو-تاراز» جشس، «گالو» كونديتەرلىك فابريكا مەن ۇسەن ساكەن سىندى ازاماتتار كومەك كورسەتتى. سونداي-اق، اراب امىرلىگى 2005 جىلدان بەرى 560 بالانىڭ كامىلەتتىك جاسقا تولعانىنشا كومەك كورسەتەدى. ەگەر قاندايدا ءبىر بالانىڭ جاسى 21-22 اسىپ كەتسە ونىڭ ورنىنا جاڭا ادامدى الىپ، ءتىزىمدى جاڭالايمىز، – دەيدى ول.
ورازكۇل تويبەكقىزىنىڭ ايتۋىنشا، «قىزىل اي» ۇيىمى حالىقتىڭ اقشاسىنىڭ ارقاسىندا قارجىلاندىرىلىپ وتىر. ياعني، قاراپايىم حالىق پەن كاسىپكەرلەردىڭ قايرىمدىلىعىنىڭ ارقاسىندا جۇمىس جۇرگىزىلۋدە.
"ادىرنا"
ۇلتتىق پورتالى
