«اتامۇرا» باسپاسىنان 3-سىنىپ وقۋشىلارىنا ارنالعان ۇلتتىق قۇندىلىقتارعا باۋليتىن «بەينەلەۋ ونەرى» وقۋلىعى جارىق كوردى 

جالپى ءبىلىم بەرەتىن مەكتەپتەردە بۇعان دەيىن ەكى ءپان بىرىگىپ، «كوركەم ەڭبەك» بولىپ وقىتىلىپ كەلدى. بيىلعى وقۋ جىلىنان باستاپ «بەينەلەۋ ونەرى» جەكە ءپان رەتىندە مەكتەپتەرگە جول تارتتى. «اتامۇرا» باسپاسىنىڭ 3-سىنىپقا ارنالعان جاڭا «بەينەلەۋ ونەرى» وقۋلىعىنداعى ءاربىر ساباق وقۋشىلاردىڭ شىعارماشىلىق قابىلەتىن، كرەاتيۆتى ويلاۋ داعدىسىن، ەستەتيكالىق تالعامى مەن جاس ەرەكشەلىگىن ەسكەرە وتىرىپ دايىندالعان. وقۋشىلار گرافيكا، كەسكىندەمە، ءمۇسىن مەن ساۋلەت ونەرى جانە قولونەرگە قاتىستى قىزىقتى مالىمەتتەر الىپ، بەينەلەۋ ونەرى تۇرلەرى تۋرالى بىلىمدەرىن ءارى قاراي جەتىلدىرەدى. سونىمەن قاتار سۋرەت ونەرىنىڭ ناتيۋرمورت، پەيزاج، پورترەت جانرىندا ءار الۋان سۋرەت سالۋعا ۇيرەنەدى. ەلىمىزدىڭ جانە الەمنىڭ ايگىلى سۋرەتشىلەرىنىڭ تۋىندىلارىمەن تانىسادى. وقۋشىلار ناتيۋرمورت سالعاندى ەرەكشە جاقسى كورەتىنى انىق. ويتكەنى ناتۋراداعى زاتتار قوزعالمايدى، بۇل سۋرەت سالۋعا ىڭعايلى. وعان قوسا زاتتاردى ءوز بەتىنشە ورنالاستىرىپ، كومپوزيتسيا قۇراستىرۋعا دا بولادى. ءارتۇرلى سىزىق، شتريحتارمەن زاتتىڭ جارىق، كولەڭكەسىن كورسەتۋگە دە مۇمكىندىك بار. وقۋشىلاردىڭ ناتيۋرمورت سالۋ ارقىلى تاعى قانداي داعدىلاردى مەڭگەرەتىنىن وقۋلىق بويىنشا تالداپ كورەيىك. مىسالى، «ۇلتتىق ناتيۋرمورت سالامىز» تاقىرىبىنان وقۋشىلار ەلىمىزدىڭ بەلگىلى سۋرەتشىلەرىنىڭ ناتيۋرمورتتارىمەن تانىسادى. سۋرەتشىلەردىڭ تۋىندىلارىنا قاراپ، اينالاسىنداعى زاتتار مەن تابيعاتتىڭ اسەمدىگىن بايقاۋعا داعدىلانادى. تاقىرىپتاعى سۇراقتارعا جاۋاپ بەرۋ ارقىلى ناتيۋرمورتتاردىڭ قايسىسى شىنايى، قايسىسى ساندىك ەكەنىن تابادى. ونى قانداي بەلگىلەرىنە قاراپ انىقتاعانىن ءتۇسىندىرىپ، ءوز ويىن ەركىن جەتكىزە الادى. وقۋشىلار كارتينالاردىڭ پىشىمىنە نازار اۋدارادى. زاتتاردى ءتۇرلى پىشىمگە سالۋ ارقىلى ناتيۋرمورتتى ءارتۇرلى ەتىپ كورسەتۋگە بولاتىنىن ۇعىنادى. زاتتاردى تىك پىشىمگە سالسا، وندا ناتيۋرمورت بيىك ءارى اسەم كورىنەدى. شارشى پىشىمگە سالىنعان ناتيۋرمورتتا ادامنىڭ نازارى بىردەن سۋرەتتىڭ ورتاسىنا اۋادى. ال كولدەنەڭ پىشىمگە سالىنعان ناتيۋرمورتتا تۇراقتىلىق سەزىلەدى. وقۋشىلار بەينەلەۋ ونەرىنىڭ وسى ەرەجەلەرىن ءبىلۋ ارقىلى گرافيكا قۇرالى – قارىنداشپەن سۋرەت سالۋ تاسىلدەرىن، ونەردىڭ قىر-سىرىن مەڭگەرەدى. سۋرەت سالۋعا قولى جاتتىعادى. وقۋشىلار ساباق بارىسىندا تورسىق، كەسە جانە المانىڭ ناتيۋرمورتىن سالادى. بىرنەشە زاتتان تۇراتىن ناتيۋرمورت سالۋ ءۇشىن ولاردى دۇرىس توپتاستىرۋدى، ياعني شەشىم قابىلداۋدى ۇيرەنەدى. الۋان ءتۇستى بوياۋلاردى ارالاستىرىپ، قاجەت تۇستەردى شىعارىپ ناتيۋرمورتتى بويايدى، وسىلايشا وقۋشىلار تۇستەردى تانيدى، تالعامى قالىپتاسادى، تاجىريبە جاساي الادى. سالعان سۋرەتىنىڭ ناتيجەسىن كورىپ، سەنىمى كۇشەيەدى، ءوزىن-ءوزى باعالاي الۋعا قالىپتاسادى. ۇلتتىق ىدىستىڭ سۋرەتىن سالىپ، ونى ويۋ-ورنەكتەرمەن ساندەۋ ارقىلى حالقىمىزدىڭ تاريحىنا، سالت-ءداستۇرى مەن ادەت-عۇرپىنا، مادەني مۇراسىنا ىنتاسى ارتىپ، ۇلتتىق قۇندىلىقتار – رۋحاني بايلىعىمىز ءارى تاربيەنىڭ ءتۇپ قازىعى ەكەنىن تۇسىنەدى. وقۋشىلار سالعان سۋرەتى مەن جاساعان بۇيىمىن تۋعان-تۋىستارىنا، دوستارىنا سىيلايدى نەمەسە ءۇيى مەن مەكتەبىن بەزەندىرەدى. بۇل وقۋشىلاردى اسەمدىككە باۋلىپ، ىزەتتى ءارى كىشىپەيىل بولۋعا تاربيەلەيدى. وقۋلىقتىڭ ەلەكتروندى نۇسقاسىندا وقۋشىلاردىڭ قىزىعۋشىلىعىن وياتىپ، تانىمىن دامىتاتىن ينتەراكتيۆتى تاپسىرما، اۋديو-ۆيدەولار، سۋرەت سالۋ ادىستەرى مەن قاجەتتى اقپاراتتار بەرىلگەن. ەلەكتروندى قۇرال ارقىلى سۇراقتاردىڭ جاۋابى مەن سۋرەتتەردى سايكەستەندىرەدى، سۋرەتتەرگە ءپىشىم تاڭدايدى، زاتتاردان ۇيلەسىمدى ناتيۋرمورت قۇراستىرادى، ونلاين باعدارلاما ارقىلى سۋرەت سالۋعا جاتتىعادى. وقۋشىلار ساباق ماتەريالىن مەڭگەرۋمەن قاتار، زاماناۋي اقپاراتتىق قۇرالداردى قولدانۋعا ۇيرەنەدى. اتالعان ءبىر ساباقتىڭ اياسىندا وقۋشىلار كوپتەگەن داعدىلاردى مەڭگەرەدى. قورىتا ايتقاندا، بەينەلەۋ ونەرى – سەزىمتال، تالعامى بيىك، جان-جاقتى، ونەرگە جاقىن، ويىن انىق جەتكىزىپ، شەشىم قابىلداي الاتىن تۇلعا تاربيلەۋگە يگى اسەر ەتەتىن بىردەن-ءبىر وقۋلىق.