الماتى قالاسىنىڭ سپورت سالاسىندا جەتىستىكتەرى ايتارلىقتاي ءوسىپ كەلەدى. بۇل تەك جەرگىلىكتى جارىستاردا عانا ەمەس، حالىقارالىق ارەنالاردا دا كورىنىس تابۋدا.
مىسالى، ورتالىق ازياداعى ەڭ ءىرى مارافوندىق شارا رەتىندە تانىلعان Almaty Marathon 2024 تۋرالى ايتار بولساق، بۇل جارىسقا 58 ەلدەن شامامەن 15 600-دەي قاتىسۋشى كەلىپ، الماتىنىڭ كورىكتى كوشەلەرىندە جارىستى. مارافون حالىقارالىق AIMS ۇيىمىنىڭ قۇرامىندا جانە ونىڭ جولدارى World Athletics تالاپتارىنا ساي سەرتيفيكاتتالعان، جانە بۇل ونىڭ بەدەلىن ارتتىرىپ، كوپتەگەن شەتەلدىك سپورتشىلاردى قىزىقتىردى. ءىس-شارانىڭ ءبىر بولىگى رەتىندە 10 شاقىرىمعا جۇگىرۋ بويىنشا قازاقستان چەمپيوناتى وتكىزىلدى، بۇل مارافونعا قاتىسۋشىلاردىڭ اراسىندا كوماندالىق ەستافەتا دا بولدى. جىل سايىنعى مارافوننىڭ قايىرىمدىلىق ميسسياسى ارقاسىندا جينالعان قارجى ءتۇرلى بالالاردى قولداۋ جوبالارىنا باعىتتالدى.
پاريج-2024 وليمپياداسى - قازاق سپورتشىلارى بۇل وليمپيادادا بىرنەشە مەدال الىپ ەل ابىرويىن قورعادى. اسىرەسە، بوكسشى نازىم قىزايباي قولا مەدالعا يە بولىپ، بۇل جەڭىسىنە ۇلكەن ءمان بەرەتىنىن اتاپ وتكەن بولاتىن. ونىڭ ايتۋىنشا، بۇل - كوپ جىلعى ەڭبەكتىڭ ناتيجەسى، ءارى وليمپياداعا قاتىسۋ - ءار سپورتشىنىڭ ارمانى. ‘’بۇل مەنىڭ العاشقى وليمپيادام. وعان قاتىسۋ - ءار سپورتشىنىڭ ارمانى... وليمپياداعى اتموسفەرا باسقاشا، ەرەكشە’’ دەپ اتاپ ءوتتى ول. ول بۇل جەتىستىگى جاستارعا ۇلگى بولىپ، سپورتقا دەگەن قىزىعۋشىلىقتارىن ارتتىراتىنىنا سەنىم ءبىلدىردى. ءدال وسى وليمپيادادا دزيۋدودان قولا مەدال جەڭىپ العان عۇسمان قىرعىزباەۆ وسى جەتىستىگى ونى جاڭا جەڭىستەرگە دەگەن شابىتىن وياتقانىن ايتادى: ‘’وليمپيادا ويىندارىندا قولا مەدال العاننان كەيىن مەن ودان ءارى جاتتىعا تۇسۋگە شابىت الدىم. الداعى وليمپيادا ويىندارىنا قاتىسۋ جوسپاردا بار’’ - دەپ، بولاشاق جارىستارعا دايىن ەكەنىن ءبىلدىردى.
بۇل پىكىرلەر سپورتشىلاردىڭ ءوز جەتىستىكتەرىنە دەگەن ماقتانىشىن جانە سپورت ارقىلى ەلگە قىزمەت ەتۋگە دەگەن ۇمتىلىسىن كورسەتەدى. وليمپيادادان كەيىن الماتى قالاسىنىڭ اكىمى ەربولات دوساەۆ جۇلدەگەرلەرگە ارنايى سىياقىلار مەن تۇرعىن ءۇي جانە كولىك كىلتتەرىن تابىستادى، بۇل سپورتشىلارعا كورسەتىلگەن قولداۋدىڭ ماڭىزدى بەلگىسى بولدى.
جالپى، ەلىمىزدە سپورتشىلارعا دەگەن قولداۋ ءتۇرلى باعىتتاردا جۇرگىزىلىپ جاتىر. بىرىنشىدەن، مەملەكەت سپورت ينفراقۇرىلىمىن دامىتۋعا ۇلكەن كوڭىل ءبولىپ جاتىر. جاڭا سپورت نىساندارىنىڭ قۇرىلىسى مەن ەسكى سپورت كەشەندەرىن جاڭارتۋ جۇمىستارى جالعاسۋدا. مىسالى، 2024 جىلى قازاقستاندا 70 جاڭا سپورتتىق عيمارات اشىلدى، بۇل سپورتشىلارىمىز ءۇشىن جوعارى دەڭگەيدەگى جاتتىعۋ مۇمكىندىكتەرىن قامتاماسىز ەتەدى. ەكىنشىدەن، جوعارى ناتيجەلەرگە قول جەتكىزگەن سپورتشىلارعا قارجىلاي قولداۋ كورسەتىلەدى. وليمپيادا مەداليستەرى مەن چەمپيوندارى اقشالاي سىياقىلار مەن ارنايى جەڭىلدىكتەرگە يە. سونىمەن قاتار، جاس سپورتشىلاردى تاربيەلەۋگە ارنالعان ارنايى باعدارلامالار بار، ول ارقىلى جاس تالانتتار قولداۋ تاۋىپ، الەمدىك ارەناعا شىعا الادى. جانە دە ەل سپورتشىلارىن شەتەلدە وقۋ مەن تاجىريبە جيناقتاۋعا جىبەرۋ، سونداي-اق مەملەكەت حالىقارالىق دەڭگەيدە تانىلعان جاتتىقتىرۋشىلار مەن مامانداردى تارتۋ ارقىلى سپورتشىلاردىڭ كاسىبي دەڭگەيىن ارتتىرۋعا كۇش سالادى.
ايگۇل مۇراتقىزى
