Almaty qalasynyŋ sport salasynda jetıstıkterı aitarlyqtai ösıp keledı. Būl tek jergılıktı jarystarda ǧana emes, halyqaralyq arenalarda da körınıs tabuda.
Mysaly, Ortalyq Aziiadaǧy eŋ ırı marafondyq şara retınde tanylǧan Almaty Marathon 2024 turaly aitar bolsaq, būl jarysqa 58 elden şamamen 15 600-dei qatysuşy kelıp, Almatynyŋ körıktı köşelerınde jarysty. Marafon halyqaralyq AIMS ūiymynyŋ qūramynda jäne onyŋ joldary World Athletics talaptaryna sai sertifikattalǧan, jäne būl onyŋ bedelın arttyryp, köptegen şeteldık sportşylardy qyzyqtyrdy. Is-şaranyŋ bır bölıgı retınde 10 şaqyrymǧa jügıru boiynşa Qazaqstan chempionaty ötkızıldı, būl marafonǧa qatysuşylardyŋ arasynda komandalyq estafeta da boldy. Jyl saiynǧy marafonnyŋ qaiyrymdylyq missiiasy arqasynda jinalǧan qarjy türlı balalardy qoldau jobalaryna baǧyttaldy.
Parij-2024 Olimpiadasy - qazaq sportşylary būl Olimpiadada bırneşe medal alyp el abyroiyn qorǧady. Äsırese, boksşy Nazym Qyzaibai qola medalǧa ie bolyp, būl jeŋısıne ülken män beretının atap ötken bolatyn. Onyŋ aituynşa, būl - köp jylǧy eŋbektıŋ nätijesı, ärı Olimpiadaǧa qatysu - är sportşynyŋ armany. ‘’Būl menıŋ alǧaşqy Olimpiadam. Oǧan qatysu - är sportşynyŋ armany... Olimpiadaǧy atmosfera basqaşa, erekşe’’ dep atap öttı ol. Ol būl jetıstıgı jastarǧa ülgı bolyp, sportqa degen qyzyǧuşylyqtaryn arttyratynyna senım bıldırdı. Däl osy Olimpiadada dziudodan qola medal jeŋıp alǧan Ǧūsman Qyrǧyzbaev osy jetıstıgı ony jaŋa jeŋısterge degen şabytyn oiatqanyn aitady: ‘’Olimpiada oiyndarynda qola medal alǧannan keiın men odan ärı jattyǧa tüsuge şabyt aldym. Aldaǧy Olimpiada oiyndaryna qatysu josparda bar’’ - dep, bolaşaq jarystarǧa daiyn ekenın bıldırdı.
Būl pıkırler sportşylardyŋ öz jetıstıkterıne degen maqtanyşyn jäne sport arqyly elge qyzmet etuge degen ūmtylysyn körsetedı. Olimpiadadan keiın Almaty qalasynyŋ äkımı Erbolat Dosaev jüldegerlerge arnaiy syiaqylar men tūrǧyn üi jäne kölık kıltterın tabystady, būl sportşylarǧa körsetılgen qoldaudyŋ maŋyzdy belgısı boldy.
Jalpy, elımızde sportşylarǧa degen qoldau türlı baǧyttarda jürgızılıp jatyr. Bırınşıden, memleket sport infraqūrylymyn damytuǧa ülken köŋıl bölıp jatyr. Jaŋa sport nysandarynyŋ qūrylysy men eskı sport keşenderın jaŋartu jūmystary jalǧasuda. Mysaly, 2024 jyly Qazaqstanda 70 jaŋa sporttyq ǧimarat aşyldy, būl sportşylarymyz üşın joǧary deŋgeidegı jattyǧu mümkındıkterın qamtamasyz etedı. Ekınşıden, joǧary nätijelerge qol jetkızgen sportşylarǧa qarjylai qoldau körsetıledı. Olimpiada medalisterı men chempiondary aqşalai syiaqylar men arnaiy jeŋıldıkterge ie. Sonymen qatar, jas sportşylardy tärbieleuge arnalǧan arnaiy baǧdarlamalar bar, ol arqyly jas talanttar qoldau tauyp, älemdık arenaǧa şyǧa alady. Jäne de el sportşylaryn şetelde oqu men täjıribe jinaqtauǧa jıberu, sondai-aq memleket halyqaralyq deŋgeide tanylǧan jattyqtyruşylar men mamandardy tartu arqyly sportşylardyŋ käsıbi deŋgeiın arttyruǧa küş salady.
Aigül Mūratqyzy
