پەتروپاۆل قالاسىندا بەلسەندى نۇربول ونەرحان سوت شەشىمىمەن 15 تاۋلىككە قاماۋعا الىندى. ءبىر كۇن بۇرىن پوليتسيا ونى سولتۇستىك قازاقستان وبلىسىنداعى ۇيىنەن الىپ كەتكەنى انىقتالعان، دەپ حابارلايدى "ادىرنا" ۇلتتىق پورتالى ازاتتىققا سىلتەمە جاساپ.
نۇربول ونەرحانعا «بەيبىت جيىن وتكىزۋ ءتارتىبىن بۇزۋ» جانە «پوليتسياعا باعىنباۋ» باپتارى بويىنشا ايىپ تاعىلدى. بەلسەندىنىڭ جاقتاسى امانگەلدى ءجاحيننىڭ ايتۋىنشا، پوليتسيا نۇربول ونەرحاندى 20 قاراشادا استانادا وپپوزيتسيالىق «العا، قازاقستان» پارتياسى ادىلەت مينيسترلىگىنە تىركەۋ قۇجاتتارىن تاپسىرعان كۇنى "زاڭسىز اكتسيا ۇيىمداستىردى" دەپ ايىپتاعان. الايدا بەلسەندى بۇل كۇنى استاناعا بارماعان، سەبەبى ول سىرقاتتانىپ قالعانىن حابارلاعان.
امانگەلدى ءجاحيننىڭ سوزىنشە، پوليتسيا نۇربول ونەرحاندى جاۋاپقا تارتۋ ءۇشىن ءساۋىر ايىندا بولعان جاعدايدى نەگىزگە العان. سوتقا دەيىن بەلسەندىنىڭ تەلەفونى ءوشىرۋلى بولدى، ال ونىڭ جاعدايى تۋرالى قوسىمشا اقپارات بەرىلگەن جوق.
قۇقىق قورعاۋشى باقىتجان تورەعوجيننىڭ مالىمدەمەسىنە سايكەس، قازاقستاندا 16 جەلتوقسان – تاۋەلسىزدىك كۇنى مەن 4-5 قاڭتار كۇنگى قاڭتار وقيعالارى قارساڭىندا بەلسەندىلەرگە قارسى «پروفيلاكتيكالىق اڭگىمەلەر» جۇرگىزۋ ءۇشىن قاماۋ جانە ۇستاۋ ارەكەتتەرى جيىلەپ كەلەدى.
ال پوليتسيا بەلسەندىلەردىڭ ۇستالۋى مەن سوت شەشىمى تۋرالى تۇسىنىكتەمە بەرۋدەن باس تارتتى.
