بۇگىن، 13 قاڭتاردا Fly Arystan اۋە كومپانياسىنىڭ استانا-وسكەمەن رەيسىنە وتىرعىزۋ كەزىندە جولاۋشىلاردىڭ ءبىرى بورتسەرىككە قول جۇمساعان. بۇل تۋرالى اۋە كومپانياسىنىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
47 جاستاعى ەر ادام ماس كۇيىندە بورتسەرىكتىڭ ىشىنەن ۇرىپ جىبەرگەن.
«وقيعا ورنىنا پوليتسيا قىزمەتكەرلەرى مەن كومپانيانىڭ اۆياتسيالىق قاۋىپسىزدىك قىزمەتىنىڭ ماماندارى شاقىرىلدى. قۇجاتتاردى تەكسەرۋ بارىسىندا دەسترۋكتيۆتى جولاۋشى بومبا بار ەكەنىن دە مالىمدەدى. وسىدان كەيىن اۋەجايدىڭ كينولوگيالىق قىزمەتى شاقىرىلىپ، بارلىق جولاۋشى ۇشاقتان شىعارىلدى. سونداي-اق، بورتسەرىكتىڭ جاعدايىن تەكسەرۋدەن وتكىزۋ ءۇشىن اۋەجايدىڭ مەديتسينالىق قىزمەتى شاقىرىلدى»،— دەلىنگەن حابارلامادا.
اۋە كومپانياسى جەدەل تۇردە مۇقيات تەكسەرىس جۇرگىزىلگەنىن اتاپ ءوتتى. ءباسپاسوز قىزمەتىنىڭ مالىمەتىنشە، ۇشاقتان جارىلعىش نەمەسە باسقا دا تىيىم سالىنعان زاتتار تابىلماعان.
قازىرگى تاڭدا كۇدىكتى ۋاقىتشا ۇستاۋ يزولياتورىندا وتىر. ونىڭ ۇستىنەن بۇزاقىلىق جانە تەرروريزم اكتىسى تۋرالى جالعان حابارلاۋ فاكتىلەرى بويىنشا قىلمىستىق ءىس قوزعالدى.
