قازىرگى تاڭدا ەلىمىزدە كوپبالالى جانە الەۋمەتتىك تۇرعىدان از قامتىلعان وتباسىلاردى باسپانامەن قامتاماسىز ەتۋ وتە وزەكتى ماسەلە بولىپ وتىر. وسى باعىتتا ەلىمىزدىڭ ءار ايماعىندا حالىقتى باسپانامەن قامتاماسىز ەتۋ جولىندا جۇمىستار جاسالىپ جاتىر.
مىسالى جامبىل وبلىسى اكىمدىگى تۇرعىنداردى باسپانامەن قامتاماسىز ەتۋ جولىندا اۋقىمدى جۇمىس اتقارۋدا. ناقتىراق ايتساق، جامبىلدىقتاردىڭ «باقىتتى وتباسى» جانە «7-20-25» باعدارلاماسى بويىنشا باسپانالى بولۋىنا مۇمكىندىك ارتادى. وبلىستىق قۇرىلىس باسقارماسىنىڭ باسشىسى جايىقباي شالداروۆتىڭ ايتۋىنشا، تىڭ باستاما قازان ايىنان باستاپ قولعا الىنادى. قازىر كومەكتىڭ قانداي ساناتتاعى ازاماتتارعا بەرىلەتىندىگى بەكىتىلىپ جاتىر.
تۇرعىن ءۇي سەرتيفيكاتتارى الەۋمەتتىك كومەك رەتىندە قايتارىمسىز جانە الەۋمەتتىك قولداۋ رەتىندە ياعني قايتارىمدى بيۋدجەتتىك كرەديت رەتىندە بەرىلمەك. سەرتيفيكات مولشەرى باستاپقى جارنانىڭ ءبىر بولىگى رەتىندە 1 ميلليون تەڭگەگە دەيىنگى قارجىنى قۇراماق. بۇل باعىتتا اعىمداعى جىلى 3,2 ميلليارد تەڭگە قاراستىرىلىپ جاتىر. سەرتيفيكات تەك جاڭا ۇيگە عانا بەرىلەدى. ەگەر ءار ادام باسىنا تابىسى 42 مىڭنان اسىپ كەتەتىن بولسا، ول سەرتيفيكات الەۋمەتتىك قولداۋ رەتىندە قايتارىمدى بولىپ بەرىلەدى. ال ەگەر قاراجات ادام باسىنا شاققاندا جەتپەيتىن بولسا، ول الەۋمەتتىك كومەك رەتىندە قايتارىمسىز بەرىلەدى. جالپى وڭىردە بيىل 465 مىڭ شارشى مەتردەن استام تۇرعىن ءۇي سالۋ جوسپارلانعان. قازىرگى تاڭدا 26 نىساننىڭ قۇرىلىسى قارقىندى ءجۇرىپ جاتىر. ونىڭ 21-ءى – مەملەكەتتىك باعدارلامالار ارقىلى جەڭىلدەتىلگەن نەسيەمەن بەرىلەتىن ۇيلەر. قازىردىڭ وزىندە 800-گە جۋىق پاتەر دايىن تۇر. جىل سوڭىنا دەيىن تاعى 740 پاتەرلى 12 ءۇيدى تاپسىرۋ كوزدەلىپ وتىر»، – دەيدى جايىقباي شالداروۆ.
باسقارما باسشىسى بۇل ورايدا سەرتيفيكات «باقىتتى وتباسى» جانە «7-20-25» باعدارلامالارى ارقىلى جۇزەگە اساتىنىن ايتىپ، ولار بويىنشا دا بەلگىلەنگەن ساناتتاردىڭ بار ەكەنىن تىلگە تيەك ەتتى. ايتالىق، «باقىتتى وتباسى» باعدارلاماسى بويىنشا مۇگەدەك بالالارى بار نەمەسە ولاردى تاربيەلەۋشi, «التىن القا»، «كۇمىس القامەن» ناگرادتالعان نەمەسە بۇرىن «باتىر انا» اتاعىن العان، سونداي-اق I جانە II دارەجەلى «انا داڭقى» وردەندەرىمەن ناگرادتالعان كوپبالالى انالار، كوپبالالى جانە تولىق ەمەس وتباسىلار اتالمىش جەڭىلدىككە قول جەتكىزبەك.
ال، «7-20-25» باعدارلاماسى اياسىندا تۇرعىن ءۇي سەرتيفيكاتتارى دەنساۋلىق ساقتاۋ، ءبىلىم بەرۋ، مادەنيەت، سپورت سالالارىنداعى جانە وزگە دە باسىم سالالارداعى قاجەتتى، تاپشى ماماندارعا ۇلەستىرىلمەك.
ايتا كەتەيىك، سالالارداعى قاجەتتى ماماندار قر ەڭبەك جانە حالىقتى الەۋمەتتىك قورعاۋ ءمينيسترىنىڭ بۇيرىعىمەن بەكىتىلگەن.
«ادىرنا»
ۇلتتىق پورتالى
