"اۆتوبۋس ەدەنىن جۋعا ماجبۇرلەگەن". الەۋمەتتىك جەلىدە تاراعان اقپارات راستالمادى

اقتوبەدە وقۋشىنىڭ اۆتوبۋس ەدەنىن جۋعا ءماجبۇر بولعانى تۋرالى اقپارات راستالمادى، دەپ حابارلايدى "ادىرنا" ۇلتتىق پورتالى.

الەۋمەتتىك جەلىلەردە №19 باعىتتاعى اۆتوبۋستىڭ جۇرگىزۋشىسى بيلەتسىز جۇرگەن وقۋشىنى سالوندى تازالاۋعا ماجبۇرلەگەنى جونىندە اقپارات تاراعان بولاتىن. وسىعان بايلانىستى قالالىق تۇرعىن ءۇي-كوممۋنالدىق شارۋاشىلىق ءبولىمى وكىلدەرىنىڭ قاتىسۋىمەن كوميسسيا قۇرىلىپ، پوليتسيا تەرگەۋ جۇرگىزدى. الايدا تەكسەرۋ ناتيجەسىندە مۇنداي فاكتىلەردىڭ راستالماعانى بەلگىلى بولدى. "اقتوبە قالاسىنداعى № 19 باعىتتاعى اۆتوبۋستار "اۆتوپارك" جشس-نە تيەسىلى. پوليتسيا وسى شاعىم بويىنشا مارشرۋتتىڭ جۇرگىزۋشىلەرىنە قاتىستى مۇقيات تەرگەۋ جۇرگىزدى. تەكسەرۋ ناتيجەسىندە وقۋشىنىڭ ەدەن جۋعا ءماجبۇر بولعاندىعى تۋرالى اقپارات راستالمادى. بۇل اقپارات جالعان. اۆتوبۋس جۇرگىزۋشىلەرىنىڭ مىندەتى — جولاۋشىنى بەلگىلەنگەن ايالداماعا قاۋىپسىز جەتكىزۋ", – دەدى اقارىس تىلەۋلەسوۆ. بۇعان دەيىن وقۋ-اعارتۋ مينيسترلىگى وقيعاعا قۇقىقتىق باعا بەرۋ ءۇشىن باس پروكۋراتۋرانىڭ ارالاسۋىن تالاپ ەتكەن ەدى. بىراق جۇرگىزىلگەن تەرگەۋ بۇل اقپاراتتىڭ نەگىزسىز ەكەنىن كورسەتتى.