قارجى مونيتورينگى اگەنتتىگى توراعاسىنىڭ ورىنباسارى جەڭىس ەلەمەسوۆ ماجىلىستە پەريزات قايراتقا قاتىستى تەرگەۋدىڭ سوڭعى كەزەڭگە جەتكەنىن مالىمدەدى. سونداي-اق، ول مۇمكىندىگى شەكتەۋلى بالالارعا ارنالعان وڭالتۋ ورتالىعىن سالۋعا قاراجات جيناۋعا بايلانىستى تاعى ءبىر ءىس انىقتالعانىن ايتتى، دەپ حابارلايدى "ادىرنا" ۇلتتىق پورتالى.
ەلەمەسوۆتىڭ ايتۋىنشا، ماتەريالدىق دالەلدەردى قوسپاعاندا ءىس 100-دەن استام تومنان تۇرادى.
"بۇل ءىس قر قىلمىستىق كودەكسىنىڭ 190-بابى (الاياقتىق) جانە 218-بابى (قىلمىستىق جولمەن الىنعان اقشانى زاڭداستىرۋ) بويىنشا تەرگەلۋدە. بىرنەشە ەپيزود قاراستىرىلۋدا. بۇعان دەيىن ءبىز ونىڭ پالەستينا مەن سۋ تاسقىنىنان زارداپ شەككەندەرگە قايىرىمدىلىق رەتىندە قاراجات جيناعانى تۋرالى حابارلاعان ەدىك. ال قاڭتاردىڭ سوڭىندا مۇمكىندىگى شەكتەۋلى بالالارعا ارنالعان وڭالتۋ ورتالىعىن قۇرۋ ءۇشىن اقشا جيناعان ءىستى تىركەدىك. ول 22 ملن تەڭگەگە جۋىق قاراجات جيناپ، ونى ءوز قاجەتىنە جۇمساعان", – دەدى جەڭىس ەلەمەسوۆ.
ونىڭ ايتۋىنشا، قازىرگى ۋاقىتتا پەريزات قايرات قاماۋدا. تەرگەۋ ناۋرىز ايىنىڭ باسىندا اياقتالىپ، سودان كەيىن ءىس ماتەريالدارىمەن تانىسۋ پروتسەسى باستالادى. بۇل تىزىمدە بلوگەردىڭ اناسى دا بار.
"قايرات پەريزاتتىڭ اناسى – الاشباەۆا دا الاياقتىق جانە قىلمىستىق جولمەن الىنعان اقشانى زاڭداستىرۋ بويىنشا كۇدىككە ءىلىندى. ازىرگە وعان ناقتى ايىپ تاعىلعان جوق جانە بۇلتارتپاۋ شاراسى قولدانىلمادى", – دەدى اگەنتتىك باسشىسىنىڭ ورىنباسارى.
ەسكە سالساق، ۆولونتەرلىك قوزعالىستىڭ بەلسەندىسى جانە قوعامدىق قايىرىمدىلىق قورىنىڭ نەگىزىن قالاۋشى پەريزات قايراتقا قاتىستى تەرگەۋ باستالعانى وتكەن جىلى بەلگىلى بولعان. ول 1,5 ميلليارد تەڭگەدەن استام قارجىنى جىمقىردى دەپ كۇدىككە الىنعان.
