Perizat Qairat ısıne qatysty tergeu aiaqtaluǧa jaqyn

Qarjy monitoringı agenttıgı töraǧasynyŋ orynbasary Jeŋıs Elemesov Mäjılıste Perizat Qairatqa qatysty tergeudıŋ soŋǧy kezeŋge jetkenın mälımdedı. Sondai-aq, ol mümkındıgı şekteulı balalarǧa arnalǧan oŋaltu ortalyǧyn saluǧa qarajat jinauǧa bailanysty taǧy bır ıs anyqtalǧanyn aitty, dep habarlaidy "Adyrna" ūlttyq portaly.  Elemesovtıŋ aituynşa, materialdyq dälelderdı qospaǧanda ıs 100-den astam tomnan tūrady. "Būl ıs QR Qylmystyq kodeksınıŋ 190-baby (Alaiaqtyq) jäne 218-baby (Qylmystyq jolmen alynǧan aqşany zaŋdastyru) boiynşa tergelude. Bırneşe epizod qarastyryluda. Būǧan deiın bız onyŋ Palestina men su tasqynynan zardap şekkenderge qaiyrymdylyq retınde qarajat jinaǧany turaly habarlaǧan edık. Al qaŋtardyŋ soŋynda mümkındıgı şekteulı balalarǧa arnalǧan oŋaltu ortalyǧyn qūru üşın aqşa jinaǧan ıstı tırkedık. Ol 22 mln teŋgege juyq qarajat jinap, ony öz qajetıne jūmsaǧan", – dedı Jeŋıs Elemesov. Onyŋ aituynşa, qazırgı uaqytta Perizat Qairat qamauda. Tergeu nauryz aiynyŋ basynda aiaqtalyp, sodan keiın ıs materialdarymen tanysu prosesı bastalady. Būl tızımde blogerdıŋ anasy da bar. "Qairat Perizattyŋ anasy – Alaşbaeva da alaiaqtyq jäne qylmystyq jolmen alynǧan aqşany zaŋdastyru boiynşa küdıkke ılındı. Äzırge oǧan naqty aiyp taǧylǧan joq jäne būltartpau şarasy qoldanylmady", – dedı agenttık basşysynyŋ orynbasary. Eske salsaq, volonterlık qozǧalystyŋ belsendısı jäne qoǧamdyq qaiyrymdylyq qorynyŋ negızın qalauşy Perizat Qairatqa qatysty tergeu bastalǧany ötken jyly belgılı bolǧan. Ol 1,5 milliard teŋgeden astam qarjyny jymqyrdy dep küdıkke alynǧan.