مەملەكەت باسشىسى قاسىم-جومارت توقاەۆ يۋ جازۋشى، قازاقستاننىڭ ەڭبەك ەرى اكىم ءتارازيدىڭ دۇنيەدەن وتۋىنە بايلانىستى كوڭىل ايتۋ جەدەلحاتىن جولدادى. بۇل تۋرالى اقوردا جازدى، دەپ حابارلايدى “ادىرنا” ۇلتتىق پورتالى.
قاسىم-جومارت توقاەۆ جازۋشىنىڭ جۇبايى، مەملەكەتتىك سىيلىقتىڭ يەگەرى روزا مۇقانوۆا مەن بالالارىنا كوڭىل ايتتى.
“اكىم تارازي بۇكىل سانالى عۇمىرىن ءسوز ونەرىنە ارناعان، ءتول ادەبيەتىمىز بەن مادەنيەتىمىزدى تورگە وزدىرعان ۇلتىمىزدىڭ ءبىرتۋار پەرزەنتى ەدى. دارىندى قالامگەر قازاق پروزاسىنىڭ كوكجيەگىن كەڭەيتتى، ۇلتتىق كينو جانە دراماتۋرگيا سالاسىنا ولشەۋسىز ۇلەس قوستى. اسىل مۇراتىنان ەشقاشان اينىماعان قالام يەسىن كوزى قاراقتى وقىرمان «ادەبيەت الەمىنىڭ اكىمى» دەپ ارداق تۇتتى، زيالى قاۋىم ونىڭ شىعارماشىلىعىمەن قاتار ادامگەرشىلىك قاسيەتتەرىن ەرەكشە باعالادى. ونەگەلى ءومىر ءسۇرىپ، سوڭىنا مول مۇرا قالدىرعان اكىم ءتارازيدىڭ جارقىن بەينەسى حالقىمىزدىڭ جۇرەگىندە ماڭگى ساقتالادى”، – دەلىنگەن جەدەلحاتتا.
