وزبەكستان جۋرناليستيكا جانە بۇقارالىق كوممۋنيكاتسيالار ۋنيۆەرسيتەتىنىڭ رەكتورى، پرەزيدەنت شاۆكات ميرزياەەۆ پرەمەر بولعان كەزدە ونىڭ ءباسپاسوز حاتشىسى بولعان شەرزودحون كۋدراتحودجا رەسەي سىرتقى ىستەر ءمينيسترى سەرگەي لاۆروۆتىڭ سامارقاندتاعى «قايعىلى انا» مەموريالىندا ورىس تىلىندەگى جازۋدىڭ بولماۋىنا قاتىستى مالىمدەمەسىنە جاۋاپ بەردى، دەپ حابارلايدى “ادىرنا” ۇلتتىق پورتالى.
بۇعان دەيىن لاۆروۆ مەموريالدى ارالاۋ بارىسىندا قازا تاپقان ساربازدارعا ارنالعان سوزدەردىڭ وزبەك جانە اعىلشىن تىلدەرىندە جازىلعانىن ايتىپ، نەگە ورىس تىلىندە جازۋ جوق ەكەنىن سۇراعان بولاتىن.
رەكتوردىڭ پىكىرىنشە، ءاربىر مەملەكەت تاريحي ەسكەرتكىشتەر مەن نىساندارعا قاتىستى ءتىل ساياساتىن ءوزى ايقىنداۋعا تولىق ەگەمەندىككە يە. ول باسقا ەلدەردىڭ جوعارى لاۋازىمدى وكىلدەرىنىڭ مۇنداي ەسكەرتۋلەر جاساۋى ورىنسىز ەكەنىن اتاپ ءوتتى.
«شەتەلدەن كەلگەن باسقا مەملەكەتتىڭ سىرتقى ىستەر ءمينيسترىنىڭ ءبىزدى سىناۋى دۇرىس ەمەس. اقىر سوڭىندا، ءبىز ولاردىڭ كولونياسى ەمەسپىز!» — دەدى ول.
سونداي-اق، ول مۇنداي ماسەلەلەر كوتەرىلەتىن بولسا، وزبەكستان دا ءوز ازاماتتارىنىڭ رەسەيدەگى جاعدايىنا نازار اۋدارۋعا قۇقىلى ەكەنىن
«نەلىكتەن ءبىزدىڭ ميگرانتتاردى رەسەيدە ءجيى كەمسىتۋگە ۇشىراتادى؟ نەلىكتەن ولاردىڭ قۇقىقتارى پوليتسيا نەمەسە باسقا بيلىك وكىلدەرى تاراپىنان بۇزىلعان كەزدە، ەشبىر شەنەۋنىك ارەكەت ەتپەيدى؟ ەگەر لاۆروۆ مىرزا مەموريالداعى جازۋ تىلىنە سۇيەنىپ، انا بەينەسىنىڭ قاسيەتتىلىگى تۋرالى ايتاتىن بولسا، ءبىز وعان ادام قۇقىقتارى دا كەم ەمەس دارەجەدە قاسيەتتى ەكەنىن ەسكە سالۋعا قۇقىلىمىز»، — دەپ تۇيىندەدى رەكتور.
ەسكە سالساق، بۇعان دەيىن سەرگەي لاۆروۆ قازاقستان پرەزيدەنتى قاسىم-جومارت توقاەۆتىڭ مەملەكەتتەردىڭ اۋماقتىق تۇتاستىعىنا قۇقىعى تۋرالى سوزدەرىمەن كەلىسپەيتىنىن مالىمدەگەن ەدى.
تالقىلاۋ قازاقستان باسشىسىنىڭ «ەگەر ۇلتتاردىڭ ءوزىن-ءوزى بيلەۋ قۇقىعى يدەياسىن باسشىلىققا الاتىن بولساق، الەمدە كوپتەگەن وڭىرلىك قاقتىعىستار باستالادى» دەگەن مالىمدەمەسىنە قاتىستى بولدى. لاۆروۆتىڭ ايتۋىنشا، توقاەۆ تەك مەملەكەتتەردىڭ اۋماقتىق تۇتاستىق قۇقىعىن ەسكەرەدى.
سول كەزدە بەلگىلى پوليتولوگ اركادي دۋبلوۆ “لاۆروۆتىڭ بۇل لاپىلدەۋى اسا ءساتتى بولمادى” دەگەن بولاتىن.
