رەسپۋبليكا كۇنىنە ارنالعان پرەزيدەنت قاسىم-جومارت توقاەۆتىڭ بايانداماسى – ەل دامۋىنىڭ باعىت-باعدارىن ايقىندايتىن، ەگەمەندىك يدەياسىنىڭ ومىرشەڭدىگىن دالەلدەيتىن ماڭىزدى ۇندەۋ بولدى.
سارسەن امانجولوۆ اتىنداعى شىعىس قازاقستان ۋنيۆەرسيتەتىنىڭ رەكتورى مۇحتار تولەگەن مەملەكەت باسشىسىنىڭ سوزىندە كوتەرىلگەن باستى قاعيداتتارعا توقتالىپ، ەلىمىزدىڭ ۇلتتىق جاڭعىرۋ جولىنداعى ساياساتى مەن جاڭا قۇندىلىقتار تۋرالى ءوز كوزقاراسىن ورتاعا سالدى.
پرەزيدەنت ەلىمىزدىڭ مەملەكەتتىك ەگەمەندىگى تۋرالى دەكلاراتسيا قابىلدانعانىنا 35 جىل تولعانىن ەسكە سالدى. ء«دال وسى كۇنى عاسىرلار بويعى مەملەكەتىمىزدىڭ ءداستۇرى قايتا جاڭعىرىپ، تاۋەلسىزدىگىمىزدىڭ تۋى بيىككە كوتەرىلدى. تاريحي ادىلەتتىلىك ورناپ، ۇلتتىق رۋحىمىز نىعايا ءتۇستى»، – دەپ تۇيىندەدى قاسىم-جومارت توقاەۆ.
- ەلدىڭ تاڭداعان باعىتى تۋرالى ءسىزدىڭ پىكىرىڭىزدى بىلگىمىز كەلەدى.
- پرەزيدەنت قاسىم-جومارت توقاەۆ ءوز بايانداماسىندا ەلىمىزدىڭ مەملەكەتتىك ەگەمەندىگى تۋرالى دەكلاراتسيا قابىلدانعانىنا 35 جىل تولعانىن اتاپ ءوتىپ، سول تاريحي كۇننىڭ ماڭىزىن ايرىقشا كورسەتتى. بۇل قۇجات — تاۋەلسىز قازاقستاننىڭ ساياسي جانە رۋحاني ىرگەتاسىن قالاعان تاريحي شەشىم بولدى.
بۇگىنگى تاڭدا ەلىمىز وسى باعىتتى لايىقتى جالعاستىرىپ كەلەدى. ەلدىڭ تاڭداعان باعىتى – ۇلتتىق مۇددەگە، تۇراقتى دامۋعا جانە ءادىل قوعام ورناتۋعا نەگىزدەلگەن. بۇل – ساياسي جاڭعىرۋ مەن ەكونوميكالىق سەرپىلىستى، ازاماتتىق جاۋاپكەرشىلىك پەن قوعامدىق كەلىسىمدى قاتار وربىتەتىن سارا جول. مەملەكەت باسشىسىنىڭ بۇل باعىتتاعى ساياساتىن ەلىمىزدىڭ بولاشاعىن ايقىندايتىن ناقتى باعدار دەپ ەسەپتەيمىن.
- ءسىزدىڭ ويىڭىزشا، مەملەكەتتىك ەگەمەندىك تۋرالى دەكلاراتسيادا ايقىندالعان قۇندىلىقتار مەن باعدارلار ادىلەتتى قازاقستاندى قۇرۋعا باعىتتالعان پرەزيدەنت توقاەۆتىڭ ساياساتى ارقىلى قانشالىقتى جۇزەگە اسىپ جاتىر دەپ ويلايسىز؟
- 1990 جىلى قابىلدانعان مەملەكەتتىك ەگەمەندىك تۋرالى دەكلاراتسيادا ادىلدىك، تاۋەلسىزدىك، حالىق بيلىگى جانە بىرلىك سەكىلدى قۇندىلىقتار ايقىندالعان بولاتىن. پرەزيدەنت قاسىم-جومارت توقاەۆ باستاعان قازىرگى ساياسات – سول رۋحاني-يدەيالىق ىرگەتاستىڭ زاماناۋي جالعاسى.
بۇگىندە “ادىلەتتى قازاقستان” تۇجىرىمداماسى وسى قۇندىلىقتاردى ءومىردىڭ بارلىق سالاسىندا جۇزەگە اسىرۋعا باعىتتالعان. ادىلدىك قاعيداتى مەملەكەتتىك باسقارۋ جۇيەسىن جاڭعىرتۋدا، ازاماتتاردىڭ الەۋمەتتىك قۇقىقتارىن قورعاۋدا جانە جاستارعا تەڭ مۇمكىندىك بەرۋدە كورىنىس تابۋدا. بۇل – دەكلاراتسيادا بەكىتىلگەن ۇلت مۇددەسىنىڭ بۇگىنگى كۇن تالابىنا ساي جۇزەگە اسۋىنىڭ ايقىن دالەلى.
- ءتورت جىل بۇرىن قاسىم-جومارت توقاەۆ رەسپۋبليكا كۇنىنە ۇلتتىق مەرەكە مارتەبەسىن قايتارىپ بەردى. بۇل كۇن نەنى بىلدىرەدى؟ ونىڭ قازاقستاندىق قوعام ءۇشىن ماڭىزى نەدە دەپ سانايسىز؟
- پرەزيدەنتتىڭ باستاماسىمەن ءۇش جىل بۇرىن، ياعني 2022 جىلى رەسپۋبليكا كۇنىنە ۇلتتىق مەرەكە مارتەبەسىنىڭ قايتارىلۋى – تاريحي ادىلەتتىلىكتىڭ ورناۋى دەپ بىلەمىز. بۇل كۇن – تاۋەلسىزدىكتىڭ باستاۋى، مەملەكەتتىلىكتىڭ قايتا تۇلەۋى جانە ۇلتتىق رۋحتىڭ جاڭعىرۋ سيمۆولى.
قازىرگى قوعام ءۇشىن رەسپۋبليكا كۇنى – ەلدىك بىرلىكتىڭ، مەملەكەتكە دەگەن قۇرمەتتىڭ جانە وتانسۇيگىشتىكتىڭ مەرەكەسى. اسىرەسە جاستار ءۇشىن بۇل كۇن – ءوز ەلىنىڭ تاريحىن تەرەڭ تۇسىنۋگە، ازاماتتىق جاۋاپكەرشىلىكتى سەزىنۋگە جانە ەل دامۋىنا ۇلەس قوسۋعا ۇندەيتىن ەرەكشە رۋحاني ءسات.
- پرەزيدەنت اتاپ وتكەندەي: ء«بىزدىڭ ەلىمىزدە ەرەن ەڭبەگىمەن ەل قۇرمەتىنە بولەنگەن ازاماتتار از ەمەس». رەسپۋبليكا كۇنىنە وراي بىرقاتار قازاقستاندىقتار مەملەكەتتىك ناگرادالارمەن ماراپاتتالدى. بيىلعى جىلى ەڭبەك ادامدارىنا، جۇمىسشى ماماندىقتارىنىڭ وكىلدەرىنە العىس بىلدىرۋگە ەرەكشە ءمان بەرىلدى دەۋگە بولا ما؟
- پرەزيدەنت ءوز سوزىندە ەل دامۋىنا ۇلەس قوسقان ەڭبەك ادامدارى مەن جۇمىسشى ماماندىقتارىنىڭ وكىلدەرىن ايرىقشا اتاپ ءوتتى. بيىل ماراپاتتالعان ازاماتتاردىڭ قاتارىندا ءوندىرىس، ءبىلىم بەرۋ، دەنساۋلىق ساقتاۋ، مادەنيەت جانە اۋىل شارۋاشىلىعى سالالارىندا ەڭبەك ەتىپ جۇرگەن مىڭداعان وتانداستارىمىز بار.
بۇل – قوعامدا ەڭبەك ادامىنىڭ مارتەبەسىن ارتتىرۋعا باعىتتالعان ماڭىزدى قادام. مەملەكەت تاراپىنان مۇنداي قۇرمەت كورسەتۋ – جاستاردى ادال ەڭبەككە، كاسىبي شەبەرلىككە جانە ەلگە قىزمەت ەتۋگە ىنتالاندىرادى. ۋنيۆەرسيتەتىمىزدىڭ دە باستى ميسسياسى – ءدال وسىنداي ەڭبەكقور، جاۋاپتى، باسەكەگە قابىلەتتى تۇلعالاردى تاربيەلەۋ.
- «جاڭا ەليتا» شىنىمەن دە ەلدىڭ جاڭعىرۋىنا، ەكونوميكالىق جانە باسقارۋشىلىق جۇيەنىڭ جاڭارۋىنا قوزعاۋشى كۇش بولا الا ما؟
- پرەزيدەنت اتاپ وتكەن «جاڭا ەليتا» ۇعىمى – تەك بيلىك نەمەسە بيزنەس سالاسىنىڭ وكىلدەرى عانا ەمەس، ەلدىڭ ءار سالاسىندا كاسىبي جانە مورالدىق تۇرعىدا ۇلگى بولا الاتىن جاڭا بۋىن ماماندار قاۋىمىن بىلدىرەدى.
جاڭا ەليتا – جاڭاشىل ويلايتىن، قوعامعا قىزمەت ەتۋدى باستى ماقسات سانايتىن، ءبىلىمى مەن باسەكەگە قابىلەتتىلىگى ارقىلى ەل دامۋىنا ۇلەس قوساتىن تۇلعالار. مۇنداي ۇرپاقتى قالىپتاستىرۋدا ۋنيۆەرسيتەتتەردىڭ ءرولى ەرەكشە. سوندىقتان ءبىز جاستارعا تەك ءبىلىم عانا ەمەس، جاۋاپكەرشىلىك پەن وتانسۇيگىشتىك رۋحىن دا دارىتۋعا كۇش سالامىز.
- توقاەۆ ءوز سوزىندە بىرلىك، تۇراقتىلىق جانە جاۋاپكەرشىلىگى جوعارى جاس ۇرپاق تاربيەلەۋدىڭ ماڭىزىن اتاپ ءوتتى. سىزدىڭشە، «ەكونوميكالىق پاتريوتيزم» ۇعىمى قازاقستان ءۇشىن نەنى بىلدىرەدى؟
- پرەزيدەنتتىڭ پىكىرىنشە، قازىرگى زاماندا ەلگە دەگەن سۇيىسپەنشىلىكتى تەك سوزبەن ەمەس، ناقتى ىسپەن – ەڭبەك، ونىمدىلىك جانە يننوۆاتسيا ارقىلى كورسەتۋ قاجەت. مىنە، وسى ۇعىمنىڭ وزەگى – ەكونوميكالىق پاتريوتيزم.
ەكونوميكالىق پاتريوتيزم – بۇل ءوز ەلىنىڭ يگىلىگى ءۇشىن ەڭبەك ەتۋ، وتاندىق ءونىمدى قولداۋ، جەرگىلىكتى كاسىپورىنداردىڭ دامۋىنا ۇلەس قوسۋ، ۇلتتىق ەكونوميكانى نىعايتۋعا مۇددەلى بولۋ. بۇل – ءار ازاماتتىڭ ءوز ەلىنىڭ بولاشاعىنا جاۋاپكەرشىلىكپەن قاراۋىنىڭ جاڭا مادەنيەتى.
ءبىلىم مەن عىلىم سالاسىندا دا ەكونوميكالىق پاتريوتيزم – ەلىمىزدىڭ كادرلىق، عىلىمي جانە يننوۆاتسيالىق الەۋەتىن ارتتىرۋ ارقىلى كورىنىس تابادى.
پرەزيدەنت قاسىم-جومارت توقاەۆتىڭ مەرەكەلىك بايانداماسى – ەلدىڭ دامۋ باعىتىن ايقىندايتىن، رۋحتى كوتەرەتىن جانە قوعامدى بىرلىككە شاقىراتىن ماڭىزدى ۇندەۋ. بۇل – ەگەمەن ەلىمىزدىڭ جاڭا بەلەستەرگە قادام باسۋىنىڭ ايقىن بەلگىسى.
