30 ءساۋىر كۇنى قازاقستاننىڭ سىرتقى ىستەر مينيسترلىگى ەلدە ينۆەستيتسيالىق ۆيزا ەنگىزىلەتىنىن مالىمدەدى، دەپ حابارلايدى "ادىرنا" ۇلتتىق پورتالى.
شەتەلدىكتەر 300 مىڭ اقش دوللارى كولەمىندە ينۆەستيتسيا سالىپ، قازاقستاندا تۇرۋعا مۇمكىندىك بەرەتىن قۇجاتقا يە بولا الادى.
سىرتقى ىستەر مينيسترلىگىنىڭ مالىمەتىنشە، بۇل ۆيزا ەلدىڭ ينۆەستيتسيالىق تارتىمدىلىعىن ارتتىرىپ، ۇزاق مەرزىمدى ىسكەرلىك سەرىكتەستىكتى قولداۋعا باعىتتالعان.
«جاڭا تالاپتارعا سايكەس، قازاقستاندىق كومپانيالاردىڭ جارعىلىق كاپيتالىنا نەمەسە وتاندىق باعالى قاعازدارعا كەمىندە 300 000 اقش دوللارى كولەمىندە ينۆەستيتسيا سالعان شەتەل ازاماتتارى ينۆەستورلىق ۆيزانى رەسىمدەۋگە ەلەكتروندى ءوتىنىم بەرە الادى. بۇل “التىن ۆيزا” كەيىننەن 10 جىلعا دەيىن تۇرۋعا رۇقسات الۋعا مۇمكىندىك بەرەدى»، – دەلىنگەن حابارلامادا.
مينيسترلىك مۇنداي ۆيزالىق باعدارلامالار حالىقارالىق تاجىريبەدە (ونىڭ ىشىندە ەۋروپا ەلدەرىندە، اقش، ءباا جانە سينگاپۋردا) كەڭ تارالعانىن جانە كاپيتال، تەحنولوگيا مەن ىسكەرلىك بەلسەندىلىكتى تارتۋدىڭ ءتيىمدى قۇرالى ەكەنىن ەسكە سالدى.
قازاقستان وسى ءتاسىلدى قابىلداپ، ينۆەستيتسيالىق رەزيدەنتتىككە ارنالعان وزىندىك ۇلگىسىن ۇسىنباق.
«التىن ۆيزالار» بەرۋ شەتەلدىك ينۆەستورلار ءۇشىن قولايلى ءارى بولجامدى ورتا قالىپتاستىرىپ، قۇقىقتىق كەپىلدىكتەر بەرەدى جانە قازاقستاننىڭ ينۆەستيتسيالىق كليماتىنا دەگەن سەنىمدى نىعايتادى. جاڭا باستاما ەلدىڭ اشىقتىققا، كاپيتالدى قورعاۋعا جانە تۇراقتى حالىقارالىق ەكونوميكالىق بايلانىستاردى دامىتۋعا باعىتتالعان ستراتەگيالىق باعدارىن كورسەتەدى»، – دەدى قر سىرتقى ىستەر مينيسترلىگى.
قۇجات رەسمي جاريالانعاننان كەيىن 10 كۇن وتكەن سوڭ كۇشىنە ەنەدى.
