30 säuır künı Qazaqstannyŋ Syrtqy ıster ministrlıgı elde investisiialyq viza engızıletının mälımdedı, dep habarlaidy "Adyrna" ūlttyq portaly.
Şeteldıkter 300 myŋ AQŞ dollary kölemınde investisiia salyp, Qazaqstanda tūruǧa mümkındık beretın qūjatqa ie bola alady.
Syrtqy ıster ministrlıgınıŋ mälımetınşe, būl viza eldıŋ investisiialyq tartymdylyǧyn arttyryp, ūzaq merzımdı ıskerlık serıktestıktı qoldauǧa baǧyttalǧan.
«Jaŋa talaptarǧa säikes, qazaqstandyq kompaniialardyŋ jarǧylyq kapitalyna nemese otandyq baǧaly qaǧazdarǧa kemınde 300 000 AQŞ dollary kölemınde investisiia salǧan şetel azamattary investorlyq vizany resımdeuge elektrondy ötınım bere alady. Būl “altyn viza” keiınnen 10 jylǧa deiın tūruǧa rūqsat aluǧa mümkındık beredı», – delıngen habarlamada.
Ministrlık mūndai vizalyq baǧdarlamalar halyqaralyq täjıribede (onyŋ ışınde Europa elderınde, AQŞ, BAÄ jäne Singapurda) keŋ taralǧanyn jäne kapital, tehnologiia men ıskerlık belsendılıktı tartudyŋ tiımdı qūraly ekenın eske saldy.
Qazaqstan osy täsıldı qabyldap, investisiialyq rezidenttıkke arnalǧan özındık ülgısın ūsynbaq.
«Altyn vizalar» beru şeteldık investorlar üşın qolaily ärı boljamdy orta qalyptastyryp, qūqyqtyq kepıldıkter beredı jäne Qazaqstannyŋ investisiialyq klimatyna degen senımdı nyǧaitady. Jaŋa bastama eldıŋ aşyqtyqqa, kapitaldy qorǧauǧa jäne tūraqty halyqaralyq ekonomikalyq bailanystardy damytuǧa baǧyttalǧan strategiialyq baǧdaryn körsetedı», – dedı QR Syrtqy ıster ministrlıgı.
Qūjat resmi jariialanǧannan keiın 10 kün ötken soŋ küşıne enedı.
