اقش پرەزيدەنتى دونالد ترامپ 8 مامىردى ەكىنشى دۇنيەجۇزىلىك سوعىستاعى جەڭىس كۇنى دەپ جاريالادى. بۇل تۋرالى ترامپ Truth Social الەۋمەتتىك جەلىسىندەگى پاراقشاسىندا جازدى، دەپ حابارلايدى “ادىرنا” ۇلتتىق پورتالى.
ءوز جازباسىندا ترامپ اقش سوعىس كەزىندە باسقا ەلدەرمەن سالىستىرعاندا الدەقايدا ۇلكەن ۇلەس قوسقانىن ايتتى.
«ءبىزدىڭ كوپتەگەن وداقتاستارىمىز بەن دوستارىمىز 8 مامىردى جەڭىس كۇنى رەتىندە اتاپ وتەدى. الايدا ءدال ءبىز — امەريكا قۇراما شتاتتارى — ەكىنشى دۇنيەجۇزىلىك سوعىستاعى جەڭىسكە كەز كەلگەن ەلدەن الدەقايدا كوپ ۇلەس قوستىق. ءتىپتى سالىستىرۋعا كەلمەيدى. سوندىقتان 8 مامىردى ەكىنشى دۇنيەجۇزىلىك سوعىستاعى جەڭىس كۇنى دەپ جاريالايمىن. ال 11 قاراشا — ءبىرىنشى دۇنيەجۇزىلىك سوعىستاعى جەڭىس كۇنى بولادى»، – دەدى ترامپ.
ترامپ اقش-تىڭ ءبىرىنشى جانە ەكىنشى دۇنيەجۇزىلىك سوعىستاردا جەڭىسكە جەتكەنىن اتاپ ءوتتى.
«ءبىز ەكى سوعىستا دا جەڭدىك. ءبىزدىڭ كۇشىمىزگە، ەرلىگىمىزگە جانە اسكەري شەبەرلىگىمىزگە ەشكىم تەڭ كەلە المادى. بىراق قازىر ءبىز ەشتەڭە تويلامايمىز. ويتكەنى بىزدە ەندى ونداي كوشباسشىلار جوق. ۋاقىتى كەلدى — جەڭىستەرىمىزدى قايتا تويلايتىن كەز جەتتى!» – دەپ قوستى ترامپ.
ايتا كەتسەك، اقش-تا رەسمي تۇردە ەكىنشى دۇنيەجۇزىلىك سوعىستىڭ اياقتالعان كۇنى رەتىندە 2 قىركۇيەك اتالىپ وتەدى — بۇل جاپونيانىڭ كاپيتۋلياتسياسىنا بايلانىستى. ال ەۋروپادا جەڭىس كۇنى 8 مامىردا اتاپ وتىلەدى — بۇل ناتسيستىك گەرمانيانىڭ تىزە بۇككەن كۇنى. كەڭەستىك جانە پوستكەڭەستىك ەلدەردە جەڭىس كۇنى - 9 مامىر.