گولوۆكيننىڭ العاشقى باپكەرى دۇنيەدەن ءوتتى

ۇلتتىق وليمپيادا كوميتەتىنىڭ پرەزيدەنتى، تانىمال بوكسشى گەننادي گولوۆكيننىڭ العاشقى باپكەرى، قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى ۆيكتور دميتريەۆ ومىردەن ءوتتى، دەپ حابارلايدى “ادىرنا” ۇلتتىق پورتالى. بوكسشى ۇستازىنىڭ وتباسىنا كوڭىل ايتتى. “ۇلتتىق وليمپيادا كوميتەتى ۇجىمىنىڭ اتىنان جانە جەكە ءوز اتىمنان ورنى تولماس اۋىر قايعىعا بايلانىستى شىن جۇرەكتەن كوڭىل ايتامىن.بۇل – بۇكىل سپورت قاۋىمداستىعى ءۇشىن عانا ەمەس، ونىڭ شاكىرتى رەتىندە مەن ءۇشىن دە اۋىر قازا. ۆيكتور كونستانتينوۆيچ تەك ۇزدىك جاتتىقتىرۋشى عانا ەمەس، ناعىز تالىمگەر، ۇستاز، ۇلگى بولاتىن جان ەدى.ونىڭ سپورتقا دەگەن ادالدىعى، كاسىبيلىگى جانە ءاربىر سپورتشىعا ەرەكشە كوزقاراسپەن قاراي ءبىلۋى ءبىزدىڭ جادىمىزدا ماڭگى ساقتالادى. ول قازاقستانداعى بوكستىڭ دامۋىنا ولشەۋسىز ۇلەس قوسىپ، تۇتاس ءبىر دارىندى سپورتشىلار بۋىنىن تاربيەلەپ شىعاردى.ورىن تولماس اۋىر قازاعا بايلانىستى شىن جۇرەكتەن كوڭىل ايتامىن. ونىڭ جارقىن بەينەسى جۇرەگىمىزدە ماڭگى ساقتالادى”، - دەلىنگەن كوڭىل ايتۋ جەدەلحاتىندا. ۆيكتور دميتريەۆ 1953 جىلى 26 شىلدەدە قاراعاندى قالاسىندا دۇنيەگە كەلگەن. اسكەر قاتارىندا بورىشىن وتەگەن سوڭ، تاۋ-كەن تەحنيكۋمىندا ءبىلىم الىپ، كوستەنكو اتىنداعى شاحتادا جۇمىس ىستەگەن. كەيىن قاراعاندى پەداگوگيكالىق ينستيتۋتىنىڭ «دەنە شىنىقتىرۋ» فاكۋلتەتىن ءتامامداپ، كاسىپتىك-تەحنيكالىق ۋچيليششەدە ۇستازدىق ەتتى. 1987 جىلدان باستاپ جاتتىقتىرۋشىلىق قىزمەتكە بەت بۇردى – اۋەلى «ەڭبەك رەزەرۆتەرى» سپورت قوعامىندا، كەيىن قاراعاندىنىڭ بىرقاتار سپورت ۇيىمدارىندا ەڭبەك ەتتى. ۆيكتور كونستانتينوۆيچ 40 جىلدان استام ءومىرىن جاستاردى جاتتىقتىرۋعا ارنادى. ول 10-نان استام قازاقستاننىڭ سپورت شەبەرىن، 20 سپورت شەبەرلىگىنە ۇمىتكەردى تاربيەلەدى. شاكىرتتەرى رەسپۋبليكالىق جانە حالىقارالىق جارىستاردا جەڭىس تۇعىرىنان كورىندى. الايدا باپكەر ەڭبەگىنىڭ باستى جەمىسى – الەم چەمپيونى گەننادي گولوۆكيننىڭ سپورت جولىنىڭ باستاۋىندا تۇرعانى ءسوزسىز.