ءماجىلىس دەپۋتاتى مۇرات ابەنوۆ استانادا رەسەيلىك پروديۋسەر يانا رۋدكوۆسكايانى حقكو-دا جەكە ءوزى ەرتىپ جۇرگەن «ازاماتتارعا ارنالعان ۇكىمەت» مەملەكەتتىك كورپوراتسياسى باسقارما توراعاسى ارمان كەنجەعاليەۆتىڭ ارەكەتىنە اشىق نارازىلىق ءبىلدىردى، دەپ حابارلايدى "ادىرنا" ۇلتتىق پورتالى.
ابەنوۆتىڭ ايتۋىنشا، مەملەكەتتىك قىزمەتتەردىڭ بارلىعى ازاماتتارعا تەڭ دارەجەدە كورسەتىلۋى ءتيىس. ال قانداي دا ءبىر «جۇلدىزدى» تۇلعاعا جەكە قىزمەت كورسەتۋ – بۇل سالىق تولەۋشى حالىقتىڭ ەسەبىنەن ارتىقشىلىق جاساۋ.
«مەملەكەت بارلىق ازاماتقا تەڭ قىزمەت كورسەتۋدى كەپىلدەيدى. ەگەر بىرەۋگە جەكە ەرىپ ءجۇرۋ ۇسىنىلسا، بۇل قىزمەتتىڭ قۇنى مەن ءتارتىبى رەسمي كورسەتىلۋى كەرەك. ارمان كەنجەعاليەۆ مىرزا كىمدەرگە ارنايى قىزمەت كورسەتەتىنىن، ول ءۇشىن قانداي "جۇلدىزدىق" دەڭگەي قاجەت ەكەنىن نەگە اشىق جاريالامايدى؟» – دەدى دەپۋتات.
ابەنوۆ بۇل ارەكەتتى مەملەكەتتىك رەسۋرستاردى ماقساتسىز پايدالانۋ دەپ باعالاپ، تسيفرلاندىرۋ ءمينيسترى جاسلان ماديەۆكە رەسمي ساۋال جولدادى. ول كەنجەعاليەۆتىڭ جەكە باستاما رەتىندە ارەكەت ەتكەنىن ايتىپ، ۆەدومستۆولىق باقىلاۋدىڭ السىزدىگىن سىنعا الدى.
«بەنزين جاعىپ، بەس ليتردەي شىعىندالعان بولار. قىزمەتكەرلەردى دە الاڭداتقان شىعار. قاراپايىم ازاماتتار سول كۇنى كەزەكتە كوپ كۇتكەن شىعار»، – دەپ اتاپ ءوتتى ول.
دەپۋتات بۇرىنعى وسىنداي جاعدايلاردى دا ەسكە سالدى. ارتەمي لەبەدەۆ پەن لەۆ لەششەنكو سەكىلدى شەتەلدىك تانىمال تۇلعالارعا دا ەرەكشە قۇرمەت كورسەتىلگەنىن ايتتى. ونىڭ ايتۋىنشا، وتاندىق شەنەۋنىكتەر ءالى كۇنگە دەيىن شەتەلدىك «جۇلدىزداردىڭ» پىكىرى مەن كوڭىلىنە كوبىرەك ءمان بەرەدى. ال قاراپايىم قازاقستاندىقتاردىڭ مۇددەسى ەكىنشى ورىندا قالىپ وتىرعانىن اتاپ ءوتتى.
