تۇرعىندار دابىلى. اتىراۋدا قوقىسقا تولى پاتەردەن زەينەتكەردىڭ ءمايىتى تابىلدى

اتىراۋ قالاسىندا كوپقاباتتى ءۇيدىڭ ءبىر پاتەرىنەن زەينەتكەردىڭ ءمايىتى تابىلدى، دەپ حابارلايدى "ادىرنا" ۇلتتىق پورتالى ينفورمبيۋرو باعدارلاماسىنا سىلتەمە جاساپ. قايعىلى جاعداي تۇرعىنداردىڭ دابىلىنان كەيىن بەلگىلى بولعان. كورشىلەردىڭ ايتۋىنشا، 60 جاستاعى جالعىزباستى زەينەتكەر پاتەرىن تۇرمىستىق قالدىقتارعا تولتىرىپ، بىرنەشە جىل بويى سول جەردە ءومىر سۇرگەن. جينالعان قوقىستان شىققان ساسىق ءيىس بۇكىل ءۇيدى جايلاپ، تۇرعىندار بالالاردىڭ دەنساۋلىعىنا الاڭداي باستاعان. اقىرى پاتەردەن ءمايىت ءيىسى شىعا باستاعاندا، پوليتسيا شاقىرىلىپ، قاريانىڭ ءولى دەنەسى تابىلدى. «ءيىس دەگەن سۇمدىق، ءتىپتى دەمالۋعا مۇمكىندىك جوق. بالالارعا ينفەكتسيا جۇعا ما دەپ قورقامىز. بۇل جەردە ءومىر ءسۇرۋ مۇمكىن ەمەس، شارشادىق. بىزگە تەك تازالىق كەرەك»، — دەيدى تۇرعىن بولعان جيدەكباي. كورشىلەرىنىڭ سوزىنشە، زەينەتكەردىڭ نەدەن جانە قاشان قايتىس بولعانى بەلگىسىز. پاتەردەگى قوقىستىڭ جىلدار بويى جينالعانى بايقالادى. تۇرعىندار ءوز قاراجاتتارىنا تازالىق جۇمىستارىن ۇيىمداستىرىپ، بىرنەشە جۇك كولىگىنە تۇرمىستىق قالدىقتاردى تيەپ شىعارۋعا ءماجبۇر بولعان. «ءيىس تاراپ جاتىر. ءبىز ءوزىمىز اقشا جيناپ، تازالاۋ جۇمىستارىن باستادىق. بىراق بۇل جەتكىلىكسىز. ءۇي تولىق زالالسىزداندىرىلۋى كەرەك»، — دەيدى تاعى ءبىر تۇرعىن. قالالىق اكىمدىك جاعدايعا ارالاسىپ، ارنايى تازالاۋ بريگاداسىن جىبەرگەن. سونىمەن قاتار، سانيتارلىق-ەپيدەميولوگيالىق قىزمەتكە رەسمي حات جولدانعان. «قازىر ارناۋلى اۆتوبازا جۇمىسشىلارى تازالىق جۇرگىزىپ جاتىر. دەزينفەكتسيا ماسەلەسى دە قارالۋدا»، — دەدى قالالىق اكىمدىكتىڭ ءباسپاسوز حاتشىسى عاسىربەك تولەگەن.