قازاق ونەرىنىڭ ابىز اقساقالى

بۇگىن قازاقتىڭ بەلگىلى كينو جانە تەاتر اكتەرى، رەجيسسەر ءاسانالى ءاشىموۆ 88 جاسقا تولدى، دەپ حابارلايدى «ادىرنا» ءتىلشىسى.

ايگىلى اكتەر 1937 جىلى جامبىل وبلىسىندا تۋعان. ول 1961 جىلى الماتى كونسەرۆاتورياسىن ءبىتىرىپ، "قازاقفيلم" كينوستۋدياسىنا ورنالاسقان. 1964 جىلى قازاق اكادەميالىق دراما تەاترىنا شاقىرىلعان. 1987-1988 جىلدارى وسى تەاتردىڭ كوركەمدىك جاعىن باسقارعان. تەاتردا س. قوجامقۇلوۆ، س. مايقانوۆا، ش. ايمانوۆ، ح. بوكەەۆا، ك. قارمىسوۆ سىندى ونەر تارلاندارىنىڭ شەبەرلىك مەكتەبىنەن ءتالىم العان.

تەاترداعى تۇڭعىش ءرولى م. اۋەزوۆ پەن ل. سوبولەۆتىڭ "اباي" سپەكتاكلىندەگى — ايدار ءرولى.  ءاشىموۆ رەجيسسەر رەتىندە دە تانىلدى. ول تەاتردا ن. گوگولدىڭ "رەۆيزور", ع. مۇسىرەپوۆتىڭ "امانگەلدى", ي. ورازباەۆتىڭ "مەن ىشپەگەن ۋ بار ما؟!",  س. ۆانۋستىڭ "سۇلتان بولسام ەگەر مەن", ج. ايماۋىتوۆتىڭ "اقبىلەك" سپەكتاكلدەرىن ساحنالادى، "جىلان جىلى", "شوقان ۋاليحانوۆ", "قوزى كورپەش—بايان سۇلۋ" (1995) فيلمدەرىن ءتۇسىردى. 

ونەر يەسى «وتان» وردەنىمەن، م.ۆ.لومونوسوۆ اتىنداعى، «التىن قىران» وردەندەرىمەن ماراپاتتالعان. كسرو جانە قر حالىق ءارتىسى، كسرو مەملەكەتتىك سىيلىعىنىڭ لاۋرەاتى.