جەتىسۋ وبلىسى كەربۇلاق اۋدانىندا كوكسۋ وزەنىنەن تروس ارقىلى وتپەك بولعان ەر ادام اعىسقا ءتۇسىپ، ءىز-ءتۇسسىز جوعالعان. وقىس وقيعا 10 مامىردا بولعان، دەپ حابارلايدى «ادىرنا» ءتىلشىسى.
«ن. ەسىمدى ازاماتتىڭ جوعالۋ دەرەگى بويىنشا قىلمىستىق ءىس قوزعالدى. پوليتسيا قىزمەتكەرلەرى، اسكەري قىزمەتكەرلەر، قۇتقارۋشىلار، باسقا دا مەكەمە وكىلدەرى مەن قاراپايىم تۇرعىنداردان قۇرالعان توپ اۋقىمدى ىزدەستىرۋ شارالارىن ۇيىمداستىردى. ىزدەستىرۋ جۇمىستارى جالعاسىپ جاتىر»،– دەپ ءتۇسىندىردى جەتىسۋ وبلىستىق پوليتسياسى.
وبلىستىق تجد مالىمەتىنشە، جوعالعان ازامات 1989 جىلى تۋعان. 11 مامىر كۇنى تاڭعى 06:30-دان باستاپ تجد، ورمان شارۋاشىلىعى، جەرگىلىكتى اتقارۋشى ورگاندار، پوليتسيا، اسكەري پوليتسيا جانە قورعانىس مينيسترلىگىنىڭ بولىمشەلەرى قاتىسقان اۋقىمدى ىزدەۋ جۇمىستارى ۇيىمداستىرىلعان. بارلىعى 98 ادام مەن 22 تەحنيكا بىرلىگى، سونىڭ ىشىندە ءجۇزۋ قۇرالدارى، دروندار جانە سپۋتنيكتىك بايلانىس قۇرالدارى جۇمىلدىرىلعان.
«ىزدەۋ جۇمىستارى كوكسۋ وزەنىنىڭ بويىمەن ۇزىندىعى 35 شاقىرىمعا دەيىنگى اۋماقتا 8 توپپەن جۇرگىزىلدى (وڭ جاعالاۋ بويىمەن 4 توپ، سول جاعالاۋ بويىمەن 4 توپ). 11 مامىردا كەشكى 18:30-دا قاراڭعى تۇسۋىنە بايلانىستى جۇمىستار ۋاقىتشا توقتاتىلدى. ىزدەۋ بۇگىن، ياعني 12 مامىر كۇنى قايتا جالعاستى»،– دەلىنگەن حابارلامادا.
<View this post on Instagram
