جەڭىس ساياباعىندا ەرسى بي بيلەگەن قىزدارعا ايىپپۇل سالىندى

پاۆلوداردا داڭق ەسكەرتكىشىنىڭ جانىندا بي بيلەگەن ەكى مەكتەپ وقۋشىسىنا ايىپپۇل سالىندى، دەپ حابارلايدى "ادىرنا" ۇلتتىق پورتالى.  جەلىدە 9 مامىر قارساڭىندا جاريالانعان "ساياباقتى قورلايمىز" دەگەن جازۋى بار ۆيدەو قازاقستاندىقتاردىڭ اشۋىن تۋعىزعان ەدى. كادرلاردان ءتور قىزدىڭ بي بيلەگەنى بايقالعان. سوت ماتەريالدارىنا سايكەس، 2025 جىلعى 2 مامىردا شامامەن ساعات 16:00-دە 2008 جانە 2009 جىلى تۋعان كامەلەتكە تولماعان ج. مەن ي. ەسىمدى قىزدار داڭق ەسكەرتكىشى مەن ماڭگىلىك الاۋ ماڭىندا ادەپسىز بي بيلەگەن. بۇل ارەكەتتەرى قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 434-بابى 4-بولىگى (ۇساق بۇزاقىلىق) بويىنشا قۇقىق بۇزۋشىلىق بولىپ تانىلادى. سوتتا قىزدار كىناسىن تولىق مويىنداپ، حورەوگرافتىڭ شاقىرۋىمەن جەڭىس كۇنىنە ارنالعان ۆيدەوروليك تۇسىرۋگە كەلگەندەرىن ءتۇسىندىردى. سوت ءباسپاسوز قىزمەتىنىڭ مالىمەتىنشە، ج. ەسىمدى قىز بۇل يدەيانى TikTok-تاعى ترەندتەن كەيىن ويلاپ تاپقانىن، تۇسىرىلىمنەن كەيىن Instagram-داعى جەكە پاراقشاعا "ساياباقتى قورلايمىز" دەگەن جازۋمەن جاريالاعانىن ايتقان. ي. ەسىمدى ەكىنشى قىز دا 9 مامىر مەرەكەسىنە بايلانىستى ۆيدەو ءتۇسىرۋ نيەتى بولعانىن، الايدا تاڭدالعان كونتەنت پەن ونىڭ بەرىلۋى ورىنسىز بولعانىن مويىنداعان. سوت 16 جاسقا تولعان ەكى قىزعا 10 ايلىق ەسەپتىك كورسەتكىش (39 320 تەڭگە) كولەمىندە ايىپپۇل سالدى. بۇل شەشىم ءالى زاڭدى كۇشىنە ەنگەن جوق. ال قالعان ەكى قىز اكىمشىلىك جاۋاپكەرشىلىك جاسىنا تولماعاندىقتان، ولاردىڭ اتا-انالارىنا قاتىستى قۇقىق بۇزۋشىلىق تۋرالى ءىس قوزعالدى. ەسكە سالايىق، 9 مامىر قارساڭىندا قازاقستاندىق مەكتەپ وقۋشى قىزدار جەڭىس ساياباعىندا "تۆەرك" ءبيىن بيلەپ، بەينەجازباعا "جەڭىس ساياباعىن قورلايمىز" دەگەن جازۋ قويعان. بۇل ارەكەت الەۋمەتتىك جەلى قولدانۋشىلارىنىڭ نارازىلىعىن تۋعىزىپ، كوپشىلىك مۇنى ەكىنشى دۇنيەجۇزىلىك سوعىستا قازا تاپقانداردىڭ رۋحىنا ءتىل تيگىزۋ دەپ باعالاپ، جاۋاپقا تارتۋدى تالاپ ەتتى.