بۇگىن شىمكەنت قالاسىندا قازاقستان حالقى اسسامبلەياسى مەن شىمكەنت قالالىق وزبەك ەتنومادەني قوعامدىق بىرلەستىگىنىڭ ۇيىمداستىرۋىمەن قازاقستان حالقى اسسامبلەياسىنىڭ 30 جىلدىعىنا ارنالعان ەرەكشە فورماتتاعى حالىقارالىق مادەني ءىس-شارا «دوستىق داستارحانى» فەستيۆالى ءوتتى. ۇلتتار مەن ۇلىستاردىڭ تاتۋلىعى مەن رۋحاني كەلىسىمىن پاش ەتكەن ايتۋلى مەرەكە ەل بىرلىگىنىڭ جارقىن كورىنىسىنە اينالدى.
مەرەكەلىك ءىس-شاراعا قازاقستان حالقى اسسامبلەياسى توراعاسىنىڭ ورىنباسارى – پرەزيدەنت اكىمشىلىگى قحا حاتشىلىعىنىڭ مەڭگەرۋشىسى مارات ءازىلحانوۆ، شىمكەنت قالاسى اكىمىنىڭ ورىنباسارى سارسەن قۇرانبەك، پارلامەنت سەناتىنىڭ دەپۋتاتتارى اليشەر ساتۆالديەۆ پەن عالياسقار سارىباەۆ، ىشكى ىستەر ورگاندارىنىڭ ارداگەرى مولديار ورازاليەۆ، قحا جانىنداعى مەدياتسيا كەڭەسىنىڭ توراعاسى، ۇلتتىق قۇرىلتاي مۇشەسى شەرزود پۋلاتوۆ، سونداي-اق وزبەكستاننان كەلگەن «ۆاتاندوشلار» قوعامدىق قورىنىڭ وكىلدەرى قاتىستى.
ءىس-شارا اياسىندا قازاقستان حالقى اسسامبلەياسىنىڭ قىزمەتىنە بەلسەندى ۇلەس قوسقان ازاماتتارعا قۇرمەت كورسەتىلىپ، ارنايى العىس حاتتار تابىستالدى. ءوز كەزەگىندە ءسوز العان قحا توراعاسىنىڭ ورىنباسارى، دەپۋتاتتار مەن قالا اكىمىنىڭ ورىنباسارى جىلى لەبىزدەرىن ءبىلدىرىپ، ەتنومادەني بىرلەستىك بەلسەندىلەرىنە العىس ءبىلدىردى.
قازاقستان حالقى اسسامبلەياسى توراعاسىنىڭ ورىنباسارى مارات ءازىلحانوۆ شىرايلى شاھاردا اتالىپ ءوتىپ وتىرعان بەرەكەلى دە تاعىلىمدى فەستيۆالدىڭ شىنىمەن دە كوڭىلدى، يگى نيەتكە قۇرىلعان كەرەمەت باسقوسۋ ەكەنىن جەتكىزدى. بۇل فەستيۆالگە جىلدا قاتىسىپ كەلە جاتقانىن، بۇرىننان تانىس جاندارمەن قايتا جۇزدەسىپ وتىرعانىن ايتا كەلە: «بۇل باستاما – ەلىمىزدەگى دوستىق پەن ءوزارا سىيلاستىقتى، مادەنيەتىمىزدىڭ الۋان تۇرلىلىگى مەن بەرىك بىرلىگىمىزدى ايقىندايتىن ماڭىزدى ءىس-شارالاردىڭ ءبىرى. بارىمىزگە ءمالىم، قازاقستان – بەيبىتشىلىك پەن كەلىسىمدى تۋ ەتكەن، ءتۇرلى ەتنوس وكىلدەرى ءبىر تۋدىڭ استىندا تاتۋ ءومىر ءسۇرىپ جاتقان مەملەكەت. مۇنداي ىنتىماق – حالقىمىزدىڭ تاريحي تاڭداۋى، كورەگەن ساياساتىنىڭ جەمىسى ءارى جارقىن بولاشاققا دەگەن سەنىمىنىڭ ايعاعى»، دەدى.
ءوز كەزەگىندە قالا اكىمىنىڭ ورىنباسارى، قالالىق قازاقستان حالقى اسسامبلەياسى توراعاسىنىڭ ورىنباسارى سارسەن قۇرانبەك ءبىز ءۇشىن داستارحان كيەلى ۇعىم، بۇل – بەرەكەنىڭ باسى. ۇلتتىق مادەنيەتتىڭ وزەگى بولعان وسى قۇندىلىقتى دارىپتەۋ باعىتىندا «دوستىق داستارحانى» جوباسى قالامىزدا 2010 جىلدان بەرى جۇيەلى ۇيىمداستىرىلادى. قالالىق وزبەك ەتنومادەني بىرلەستىگى مەن قازاقستان حالقى اسسامبلەياسى بىرلەسە باستاماشى بولعان فەستيۆال 2022 جىلدان بەرى «دوستىق داستارحانى – شىمكەنت پالاۋى» دەگەن اتاۋمەن وتكىزىلىپ كەلەدى. ماقساتىمىز – ەلدەگى بىرلىك پەن دوستىقتىڭ كورىنىسىن وسى ءىس-شارا ارقىلى ناسيحاتتاۋ. ءبىر داستارحان باسىندا بارشا ۇلت وكىلدەرى وتىرىپ، باس قوساتىنىن جۇرتشىلىققا پاش ەتۋ»،- دەدى. سونداي-اق، ول «ءبىز ەجەلدەن جاقسىنى جانىنا تارتقان باۋىرمال، جانى جومارت، قوناقجاي، كەڭ پەيىلدى حالىقپىز. سىيلاستىق، دوستىق، قوناقجايلىق، سابىرلىق – سىندى قۇندىلىقتاردىڭ ارقاسىندا ءبىزدىڭ ورتاق ءۇيىمىز قازاقستاندا بەيبىتشىلىك پەن قوعامدىق كەلىسىم ساقتالىپ وتىر. ال بەرەكەلى بىرلىكتىڭ قادىرىن ءبىلۋ، بايىپتى باعامداۋ سىزدەر مەن بىزدەرگە جۇكتەلىپ وتىرعان مەرەيلى مىندەت ەكەنىن ۇعىنۋعا ءتيىسپىز»، - دەدى.
فەستيۆالدىڭ باستى نىشانى – كوپشىلىككە دايىندالعان ءداستۇرلى پالاۋ تاعامى بولدى. بىراق بۇل جاي عانا اس ەمەس، ەل بىرلىگى مەن ۇلتتار دوستىعىنىڭ سيمۆولىنا اينالعان تاعام رەتىندە جاڭاشا ماعىناعا يە بولدى. بيىلعى فەستيۆالدىڭ ەرەكشەلىگى – قازاقستان حالقى اسسامبلەياسىنىڭ 30 جىلدىعىنا وراي 30 قازان پالاۋ ازىرلەنىپ، ءار قازانعا «بىرلىك»، «دوستىق»، «جەڭىسكە 80 جىل»، «بايتەرەك» سەكىلدى ءمانى تەرەڭ اتاۋلار بەرىلدى.
مەرەكە 2022 جىلدان بەرى تۇراقتى تۇردە وتكىزىلىپ كەلەدى. فەستيۆال اياسىندا قازاقستان وڭىرلەرىنەن، سونداي-اق وزبەكستان مەن ءازىربايجاننان كەلگەن ۇزدىك اسپازدار ارنايى شاقىرىلىپ، ءوز شەبەرلىكتەرىن پاش ەتتى. ءار اسپاز ءتۇرلى ادىسپەن پالاۋ دايىنداپ، قوناقتاردى تاڭعالدىردى.
فەستيۆال بارىسىندا ارنايى قازانداردا دايىندالعان 100 كەلى پالاۋ شىمكەنت قالالىق قازاقستان حالقى اسسامبلەياسىنىڭ ۆولونتەرلارى ارقىلى بالالار ۇيلەرى مەن كوپبالالى وتباسىلارعا تاراتىلدى. دەمەك وسىنداي تاعام دايىنداۋ ارقىلى جاقسىلىق جاساۋعا ۇندەيتىن يگى باستاما بولدى. سونىمەن قاتار، مۇنداعى دايىندالعان پالاۋلار اراسىندا «ەڭ جاس اسپاز»، «ەڭ ۇلكەن اسپاز»، «جىلدىڭ ۇزدىك اسپازى»، «كوپشىلىك قوشەمەتىنە لايىق اسپاز» سەكىلدى اتالىمداردا ۇزدىكتەر ماراپاتتالدى. باعالاۋ كەزىندە تاعامنىڭ ءدامى عانا ەمەس، ونى ازىرلەۋ شەبەرلىگى، كوركەم بەزەندىرىلۋى، اسپازداردىڭ كيىم ۇلگىسى مەن قىزمەت كورسەتۋ مادەنيەتى دە ەسكەرىلدى.
فەستيۆالگە قالالىق ءماسليحات دەپۋتاتتارى، قوعامدىق كەڭەس مۇشەلەرى، ەتنومادەني بىرلەستىكتەر مەن جاستار ۇيىمدارى، اقساقالدار مەن انالار كەڭەسىنىڭ وكىلدەرى بەلسەندى اتسالىستى. بۇنىڭ ءوزى ۇلت پەن ۇرپاقتىڭ اراسىنداعى التىن كوپىر. ياعني جاستار دا تاعام ارقىلى ۇلتتىڭ رۋحىن تانىپ، بەيبىتشىلىك پەن بىرلىكتىڭ قادىرىن ۇعىنادى.
تاتۋلىقتى تۋ ەتكەن مۇنداي مازمۇندى مەرەكەلىك ءىس-شارا قازاق جەرىندە تامىرىن تەرەڭگە جايعان دوستىقتىڭ ءدامىن جۇرتشىلىققا سەزدىرگەن ەرەكشە مادەني وقيعا بولدى. بەيبىتشىلىك پەن كەلىسىمنىڭ جارقىن سيمۆولى عانا ەمەس، قازاقستان حالقى اسسامبلەياسىنىڭ ەل ىشىندەگى ۇلتتار تاتۋلىعىن ساقتاۋ جولىنداعى 30 جىلدىق قاجىرلى ەڭبەگىنىڭ جەمىسىن كورسەتتى.
