رەسەي پرەزيدەنتى ۆلاديمير پۋتين مەن ۋكراينا پرەزيدەنتى ۆلاديمير زەلەنسكي كەزدەسۋى مۇمكىن، دەپ حابارلايدى "ادىرنا" ۇلتتىق پورتالى DW-عا سىلتەپ.
بىراق بۇل كەزدەسۋ تەك ەكى ەلدىڭ وكىلدەرى ءوزارا ناقتى كەلىسىمدەرگە كەلگەننەن كەيىن عانا وتەدى. بۇل تۋرالى رەسەي پرەزيدەنتىنىڭ ءباسپاسوز حاتشىسى دميتري پەسكوۆ مالىمدەدى.
پەسكوۆتىڭ ايتۋىنشا، رەسەي ۋكرايناعا اتىستى توقتاتۋ ءۇشىن قانداي شارتتاردى ورىنداۋ كەرەكتىگى تۋرالى ۇسىنىستارىن دايىنداپ جاتىر. بىراق بۇل شارتتار ازىرگە جاريالانبايدى. ويتكەنى كەلىسسوزدەر جابىق تۇردە ءوتۋى كەرەك دەيدى ول.
2022 جىلدان بەرى العاش رەت رەسەي مەن ۋكراينا دەلەگاتسيالارى 2025 جىلدىڭ 16 مامىر كۇنى تۇركيانىڭ ستامبۇل قالاسىندا تىكەلەي كەزدەستى. كەلىسسوز شامامەن ءبىر جارىم ساعاتقا سوزىلعان. رەسەي تارابىن ۆلاديمير مەدينسكي، ال ۋكراينا دەلەگاتسياسىن قورعانىس ءمينيسترى رۋستەم ۋمەروۆ باسقاردى.
كەزدەسۋدە تاراپتار جاقىن كۇندەرى «1000-عا 1000» فورمۋلاسى بويىنشا تۇتقىندار الماسۋعا كەلىسكەن. سونىمەن قاتار، الداعى ۋاقىتتا پۋتين مەن زەلەنسكيدىڭ جەكە كەزدەسۋى دە مۇمكىن ەكەنى ايتىلدى.
Bloomberg اگەنتتىگىنىڭ حابارلاۋىنشا، رەسەي كەلىسسوز بارىسىندا ۋكرايناعا بىرقاتار تالاپتار قويعان. تالاپ بويىنشا ۋكراينا قىرىم مەن دونەتسك، لۋگانسك، حەرسون جانە زاپوروجە وبلىستارىنان باس تارتۋى ءتيىس. بۇل ايماقتاردى حالىقارالىق دەڭگەيدە رەسەيگە تيەسىلى دەپ مويىنداۋى كەرەك. ال ۋكراينا بەيتاراپ ەل بولۋى كەرەك، ياعني ءوز اۋماعىندا شەتەل اسكەرىن جانە جاپپاي قىرىپ-جوياتىن قارۋ ۇستاۋعا بولمايدى. رەسەي تاراپىنىڭ تالابىنا سايكەس، ۋكراينا رەسەيدەن وتەماقى تالاپ ەتۋىنەن باس تارتۋى قاجەت.
الايدا ۋكراين دەلەگاتسياسى بۇل تالاپتاردى شىندىققا جاناسپايدى جانە كەلىسسوزگە كەدەرگى كەلتىرەدى دەپ ەسەپتەيدى.
