سىبايلاس جەمقورلىققا قارسى ءىس-قيمىل اگەنتتىگى تانىمال رەجيسسەر ەرمەك تۇرسىنوۆقا قاتىستى تەرگەۋ ارەكەتتەرى جۇرگىزىلمەگەنىن رەسمي تۇردە مالىمدەدى، دەپ حابارلايدى "ادىرنا" ۇلتتىق پورتالى.
ۆەدومستۆونىڭ مالىمەتىنشە، تۇرسىنوۆ Facebook پاراقشاسىندا جاريالاعان اقپارات اگەنتتىككە بەيمالىم بولعان. سونىمەن قاتار، انتيكور بۇعان دەيىن "قازاقفيلم" كينوستۋدياسىنىڭ بۇرىنعى باسشىلىعىنا قاتىستى سوتقا دەيىنگى تەرگەۋ باستالعانىن حابارلادى. تەرگەۋ "دولگوە ەحو" ءفيلمىن دايىنداۋ كەزىندە قىزمەتتىك وكىلەتتىكتەرىن تەرىس پايدالانۋ دەرەگى بويىنشا جۇرگىزىلۋدە. ارىزدى رەجيسسەر "ن" تۇسىرگەن.
بۇل ىستەگى قوسالقى مەردىگەر – "Alashfilm" جشس-ءنىڭ بۇرىنعى ديرەكتورى – ازامات "ت". تەرگەۋ بارىسىندا بۇل ازامات رەجيسسەر ەرمەك تۇرسىنوۆپەن "تۇرسىنوۆفيلم" جشس اياسىندا سەرىكتەس بولعانى انىقتالعان.
"اlاshfilm" جشس-ءنىڭ بۇرىنعى باسشىسى "ت" كۋاگەر رەتىندە تەرگەۋ ارەكەتتەرىنە قاتىسقان. ال ەرمەك تۇرسىنوۆتىڭ ءوزى تەرگەۋ ورگانىنا شاقىرىلماعان.
انتيكور قازىرگى ۋاقىتتا ەشكىم كۇدىكتى رەتىندە تانىلماعانىن، ال قىلمىستىق-پروتسەستىك كودەكستىڭ 201-بابىنا سايكەس وزگە اقپارات جاريا ەتۋگە جاتپايتىنىن حابارلادى.
بۇعان دەيىن ەرمەك تۇرسىنوۆتىڭ الەۋمەتتىك جەلىدە قازاقستاننان كەتكەنىن ايتقانى تۋرالى جازعان ەدىك.
