Sybailas jemqorlyqqa qarsy ıs-qimyl agenttıgı tanymal rejisser Ermek Tūrsynovqa qatysty tergeu äreketterı jürgızılmegenın resmi türde mälımdedı, dep habarlaidy "Adyrna" ūlttyq portaly.
Vedomstvonyŋ mälımetınşe, Tūrsynov Facebook paraqşasynda jariialaǧan aqparat agenttıkke beimälım bolǧan. Sonymen qatar, Antikor būǧan deiın "Qazaqfilm" kinostudiiasynyŋ būrynǧy basşylyǧyna qatysty sotqa deiıngı tergeu bastalǧanyn habarlady. Tergeu "Dolgoe eho" filmın daiyndau kezınde qyzmettık ökılettıkterın terıs paidalanu deregı boiynşa jürgızılude. Aryzdy rejisser "N" tüsırgen.
Būl ıstegı qosalqy merdıger – "Alashfilm" JŞS-nıŋ būrynǧy direktory – azamat "T". Tergeu barysynda būl azamat rejisser Ermek Tūrsynovpen "Tūrsynovfilm" JŞS aiasynda serıktes bolǧany anyqtalǧan.
"Alashfilm" JŞS-nıŋ būrynǧy basşysy "T" kuäger retınde tergeu äreketterıne qatysqan. Al Ermek Tūrsynovtyŋ özı tergeu organyna şaqyrylmaǧan.
Antikor qazırgı uaqytta eşkım küdıktı retınde tanylmaǧanyn, al Qylmystyq-prosestık kodekstıŋ 201-babyna säikes özge aqparat jariia etuge jatpaitynyn habarlady.
Būǧan deiın Ermek Tūrsynovtyŋ äleumettık jelıde Qazaqstannan ketkenın aitqany turaly jazǧan edık.
