ۆاتيكان ۋكرايناداعى بەيبىت كەلىسسوزدەرگە دەلدال بولمايدى. بۇل تۋرالى اقش مەملەكەتتىك حاتشىسى ماركو رۋبيو ريمدە يتاليا ەپيسكوپتارى كونفەرەنتسياسىنىڭ توراعاسى كاردينال ماتتەو دزۋپپيمەن كەزدەسۋدەن بۇرىن جۋرناليستەرگە مالىمدەدى، دەپ حابارلايدى "ادىرنا" ۇلتتىق پورتالى تاسس-قا سىلتەمە جاساپ.
اڭگىمە ءماتىنىن اقش مەملەكەتتىك دەپارتامەنتى جاريالاعان.
اقش-تىڭ سىرتقى ساياسي ۆەدومستۆو باسشىسىنان ۆاتيكان ۋكرايناداعى قاقتىعىستى رەتتەۋدە دەلدال بولا الا ما دەپ سۇراعاندا، رۋبيو:
«مەن ونى دەلدال دەپ اتاماس ەدىم، بىراق بۇل — ەكى تاراپقا دا بارۋعا ىڭعايلى ورىن. سول سەبەپتى ءبىز ۆاتيكاننىڭ تەك بەيبىتشىلىكتى ورناتۋدا عانا ەمەس، تۇتقىندار الماسۋ باعىتىنداعى كوپجىلدىق كۇش-جىگەرىنە ريزاشىلىعىمىزدى بىلدىرەمىز»، – دەدى.
سونداي-اق ول بىلاي دەپ قوستى:
«كەيبىر ەلدەر مۇنداي ۇسىنىس ءبىلدىرىپ تە جاتىر، الايدا بۇل — ءبىز ءالى دە تالقىلايتىن ماسەلە. ءبىز كەلىسسوزدەردىڭ قازىرگى مارتەبەسى، كەشە (16 مامىر) ستامبۋلدا وتكەن رەسەي مەن ۋكراينا اراسىنداعى كەلىسسوزدەردەن كەيىنگى جاعدايلار تۋرالى، ءارى قاراي نە ىستەۋ كەرەكتىگى جايلى سويلەسەتىن بولامىز».
اقش مەملەكەتتىك دەپارتامەنتىنىڭ ءباسپاسوز قىزمەتىنىڭ جەتەكشىسى تەممي ءبريۋستىڭ جازباشا مالىمدەمەسىنە سايكەس، رۋبيو ۆاتيكاننىڭ مەملەكەتتىك حاتشىسى كاردينال پەترو پارولينمەن جانە مەملەكەتتەرمەن بايلانىس جونىندەگى حاتشى ارحيەپيسكوپ پول ريچارد گاللاحەرمەن دە كەزدەسكەن. كەزدەسۋ بارىسىندا ۋكراينا مەن تاياۋ شىعىستاعى قاقتىعىستاردى بەيبىت جولمەن شەشۋ ماسەلەلەرى تالقىلانعان.
