قازاقستاندا اۋىلدىق جەرلەردەگى بالالار مەن جاسوسپىرىمدەردىڭ سپورتقا قولجەتىمدىلىگىن ارتتىرۋ، بۇقارالىق سپورتتى دامىتۋ جانە سالاۋاتتى ءومىر سالتىن ناسيحاتتاۋ باعىتىندا تاعى ءبىر ماڭىزدى قادام جاسالدى. 2024 جىلى باستالعان AUYLSPORT جوباسىنىڭ اياسىندا Halyk قايىرىمدىلىق قورى مەن ەلىمىزدىڭ باسكەتبول جانە ۆولەيبول فەدەراتسيالارى اراسىندا ءوزارا ىنتىماقتاستىق تۋرالى مەموراندۋمعا قول قويىلدى.
سپورت – اۋىل بولاشاعىنىڭ تىرەگى
تيمۋر جانە دينارا قۇلىباەۆتار نەگىزىن قالاعان Halyk قورى اۋىلدارداعى الەۋمەتتىك جانە ينفراقۇرىلىمدىق ماسەلەلەردى شەشۋگە باعىتتالعان باستامالاردى قولداپ كەلەدى. سونىڭ جارقىن مىسالى – AUYLSPORT جوباسى.
ىنتىماقتاستىق اياسىندا تاراپتار كەلەسى باعىتتاردا جۇمىس جۇرگىزۋدى جوسپارلاپ وتىر:
- اۋىل جاستارى ءۇشىن قولجەتىمدى سپورتتىق سەكتسيالار اشۋ;
- جاتتىقتىرۋشىلاردى قايتا دايارلاۋ جانە كاسىبي بىلىكتىلىگىن ارتتىرۋ;
- تورەشىلەر كورپۋسىن جاساقتاۋ;
- وڭىرلىك، رەسپۋبليكالىق جانە حالىقارالىق جارىستار وتكىزۋ;
- سپورت قۇرال-جابدىقتارىمەن قامتاماسىز ەتۋ.
قۇجاتقا Halyk قورىنىڭ اتقارۋشى ديرەكتورى عالىمبەك جاقسىلىقوۆ، قر ۇلتتىق باسكەتبول فەدەراتسياسىنىڭ باس حاتشىسى جۇلدىز بايدۋسەنوۆا، سونداي-اق قازاقستان ۆولەيبول فەدەراتسياسىنىڭ ۆيتسە-پرەزيدەنتى ەرمەك سىرلىباەۆ قول قويدى.
2024 جىلى ىسكە قوسىلعان جوبا اۋىلدىق وڭىرلەردە ۇلكەن قولداۋعا يە بولدى. قىسقا ۋاقىت ىشىندە AUYLSPORT اياسىندا بارلىق وڭىردە ون مىڭنان اسا بالا ءتۇرلى سپورت تۇرىمەن جۇيەلى تۇردە اينالىسا باستادى.
جوبانىڭ ناتيجەلىلىگىن دالەلدەيتىن باستى وقيعالاردىڭ ءبىرى – سەربيادا وتكەن حالىقارالىق گيمنازيادا. بۇل دودادا ەل نامىسىن قورعاعان 22 سپورتشىنىڭ 12-ءسى – ءدال وسى جوبا اياسىندا دايىندالعان جاستار. ولار ءوز ونەرلەرىمەن قازاقستاننىڭ ابىرويىن اسقاقتاتىپ، AUYLSPORT باستاماسىنىڭ ومىرشەڭدىگىن كورسەتتى.
قازاقستاننىڭ باسكەتبول جانە ۆولەيبول فەدەراتسيالارى – ەلىمىزدەگى جەتەكشى سپورت ۇيىمدارى. ولاردىڭ AUYLSPORT جوباسىنا قوسىلۋى اۋىل سپورتىن جاڭا دەڭگەيگە كوتەرەدى. بۇل ىنتىماقتاستىق تاجىريبەلى جاتتىقتىرۋشىلار مەن ادىستەمەلىك قولداۋعا جول اشىپ، اۋىل بالالارى ءۇشىن ۇلكەن مۇمكىندىكتەر ۇسىنادى.
Halyk قورىنىڭ اتقارۋشى ديرەكتورى عالىمبەك جاقسىلىقوۆ وز سوزىندە:
«بۇگىن باسكەتبول جانە ۆولەيبول فەدەراتسيالارىمەن جاسالعان مەموراندۋم – AUYLSPORT جوباسىنىڭ دامۋىنا تىڭ سەرپىن بەرەتىنىنە سەنەمىز. بۇل سەرىكتەستىك اۋىلدىق جەرلەردەگى سپورت ينفراقۇرىلىمىن نىعايتىپ، جاس سپورتشىلاردىڭ دامۋىنا كەڭ جول اشادى. ءارى ولاردىڭ سالاۋاتتى ءومىر سالتىن ۇستانۋىنا سەپتىگىن تيگىزەدى»، – دەپ اتاپ ءوتتى.
بۇل مەموراندۋم – اۋىل جاستارىنا جاڭا مۇمكىندىكتەر ۇسىناتىن، بۇقارالىق سپورتتى دامىتاتىن جانە قايىرىمدىلىق مادەنيەتىن ىلگەرىلەتەتىن ماڭىزدى ستراتەگيالىق قادام. تاراپتار الداعى ۋاقىتتا ىنتىماقتاستىقتى ودان ءارى تەرەڭدەتىپ، ەلىمىزدىڭ بارلىق وڭىرلەرىندە اۋىل سپورتىنىڭ قولجەتىمدىلىگىن ارتتىرۋ ءۇشىن جۇيەلى جۇمىستار جۇرگىزۋگە نيەتتى ەكەندەرىن جەتكىزدى.
ەسكە سالايىق، AUYL SPORT جوباسى 2024 جىلى وبلىستىق دەڭگەيدەگى تۋرنيرلەردەن باستاۋ الدى. وعان 200 اۋىلدان 12 مىڭنان استام بالا مەن ءجاسوسپىرىم قاتىسىپ، سپورتقا دەگەن قىزىعۋشىلىقتارىن تانىتتى. باسكەتبول مەن ۆولەيبول – جوبا اياسىندا قامتىلعان التى سپورت ءتۇرىنىڭ ىشىندە. جوبانىڭ رەسپۋبليكالىق ءتۋرنيرىنىڭ فينالى ەلىمىزدىڭ 17 وبلىسىنان 1300-دەن استام جاس سپورتشىنى ءبىر الاڭدا توعىستىرىپ، اۋىل سپورتىن جاڭا دەڭگەيگە كوتەردى.
Halyk قايىرىمدىلىق قورى – ەلىمىزدىڭ تۇكپىر-تۇكپىرىندەگى مۇقتاج جانداردى قولداۋعا جانە حالىقتىڭ ءومىر ءسۇرۋ ساپاسىن جاقسارتۋعا باعىتتالعان الەۋمەتتىك باستامالارعا ۇدايى قولداۋ كورسەتىپ كەلە جاتقان ءىرى ۇيىم. قور اۋىلداعى سپورتتى دامىتۋعا 500 ميلليون تەڭگەگە جۋىق قارجى ءبولدى. سونىمەن قاتار، وسى كۇنگە دەيىن 120-دان استام الەۋمەتتىك جوبانى جۇزەگە اسىرىپ، وعان 85 ميلليارد تەڭگە كولەمىندە قاراجات جۇمسادى.
AUYL SPORT جاسوسپىرىمدەرگە ارنالعان جاڭا مۇمكىندىك، بولاشاق چەمپيوندارعا العاشقى باسپالداق. تيمۋر قۇلىباەۆتىڭ باستاماسىمەن قولعا الىنعان بۇل جوبا اۋىل سپورتىنا سەرپىن بەرىپ، مىڭداعان بالانىڭ ءومىرىن وزگەرتىپ جاتىر.
باسقالارمەن بولىسە
وتىرىڭىز
