17 مامىر كۇنى ەگيپەتتە شارم-ەل-شەيح قالاسىنىڭ حالىقارالىق اۋەجايىندا جارناما تاقتاسى قۇلاپ قازا تاپقان اقمارال مۇقانوۆانىڭ جاقىندارى ونىڭ دەنەسىن قازاقستانعا جەتكىزۋ ءۇشىن كومەك سۇراپ وتىر، دەپ حابارلايدى "ادىرنا" ۇلتتىق پورتالى.
مارقۇم اقمارال مۇقانوۆا اقتوبە وبلىسى پوليتسيا دەپارتامەنتىندە 20 جىلدان استام ۋاقىت قىزمەت ەتكەن. زەينەتكە پودپولكوۆنيك شەنىندە شىققان. قىزمەت بارىسىندا كادر بولىمىندە جۇمىس ىستەپ، كوپتەگەن جاس قىزمەتكەردىڭ قۇقىق قورعاۋ ورگاندارىنا قابىلدانۋىنا اتسالىسقان. ارىپتەستەرى ونى كاسىبي، ءادىل ءارى مەيىرىمدى ادام رەتىندە سيپاتتايدى.
اقمارالدىڭ جاقىندارى ونىڭ دەنەسىن قازاقستانعا جەتكىزۋ ءۇشىن مەملەكەتتىك ورگانداردان جانە ءتيىستى مەكەمەلەردەن كومەك سۇرايدى. قازىرگى ۋاقىتتا مارقۇمنىڭ جالعىز ۇلى بەرىك ەگيپەتتە قالىپ وتىر. جاس جىگىت اناسىنىڭ قازاسىنان ەسەڭگىرەپ قالعان، ونىڭ جاعدايىنا الاڭداۋشىلىق بار. ەگيپەت تاراپى ءمايىتتى 4-5 كۇننەن كەيىن عانا بەرەتىنىن حابارلاعان. قايعىلى وقيعاعا بايلانىستى تەرگەۋ امالدارىن جەرگىلىكتى پوليتسيا جۇرگىزىپ جاتىر.
قر سىرتقى ىستەر مينيسترلىگى مارقۇمنىڭ تۋىستارىمەن بايلانىس ورناتقانىن، كونسۋل تاراپىنان ءتيىستى كومەك كورسەتىلىپ جاتقانىن مالىمدەدى.
قازا تاپقان ازاماتتىڭ تۋعان-تۋىستارى مەن جاقىندارىنا قايعىرا كوڭىل ايتامىز.
