ترامپ پەن پۋتين ەكى ساعات سويلەستى

اقش پرەزيدەنتى دونالد ترامپ رەسەي پرەزيدەنتى ۆلاديمير پۋتينمەن تەلەفون ارقىلى سويلەسكەننەن كەيىن رەسەي مەن ۋكراينا سوعىستى تولىق اياقتاۋ تۋرالى كەلىسسوزدى باستايتىنىن مالىمدەدى، دەپ حابارلايدى “ادىرنا” ۇلتتىق پورتالى.  «ۆلاديمير پۋتينمەن جاڭا عانا اڭگىمەم اياقتالدى. بۇل وتە جاقسى ءوتتى دەپ ەسەپتەيمىن. رەسەي مەن ۋكراينا اتىستى توقتاتۋ تۋرالى كەلىسسوزدەردى بىردەن باستايدى، جانە ودان دا ماڭىزدىسى – سوعىستى تولىقتاي توقتاتۋ جايلى سويلەسەتىن بولادى. كەلىسسوز شارتتارى ەكى تاراپ اراسىندا تالقىلانادى — بۇل دۇرىس، سەبەبى تەك سولار عانا كەلىسسوز ۇدەرىسىن ناقتى  بىلەدى. رەسەي بۇل قاسىرەتتى «قاندى قىرعىن» اياقتالعاننان كەيىن اقش-پەن اۋقىمدى ساۋدا بايلانىسىن ورناتقىسى كەلەدى. مەن بۇل يدەيانى قولدايمىن. رەسەيدە جۇمىس ورىندارىن اشۋعا جانە ءال-اۋقاتتى ارتتىرۋعا زور مۇمكىندىك بار. ونىڭ الەۋەتى — شەكسىز. ۋكراينا دا ءوز ەلىن قالپىنا كەلتىرۋ جولىندا ساۋدا قارىم-قاتىناسىنىڭ ءىرى بەنەفيتسيارى بولا الادى. رەسەي مەن ۋكراينا اراسىنداعى كەلىسسوزدەر بىردەن باستالادى. مەن بۇل جايلى ۋكراينا پرەزيدەنتى ۆلاديمير زەلەنسكيگە، ەۋروپا كوميسسياسىنىڭ پرەزيدەنتى ۋرسۋلا فون دەر ليايەنگە، فرانتسيا پرەزيدەنتى ەممانۋەل ماكرونعا، يتاليا پرەمەر-ءمينيسترى دجوردجيا مەلونيگە، گەرمانيا كانتسلەرى فريدريح مەرتسكە جانە فينليانديا پرەزيدەنتى الەكساندر ستۋببقا پۋتينمەن سويلەسكەننەن كەيىن بىردەن تەلەفون ارقىلى حابارلادىم. ۆاتيكان بۇل كەلىسسوزدەردىڭ ءوز اۋماعىندا وتۋىنە مۇددەلى ەكەنىن پاپا ريمسكيدىڭ سوزىنەن بىلدىك. پروتسەس باستالسىن!»، – دەپ جازدى ترامپ. رەسەي پرەزيدەنتى ۆلاديمير پۋتين اقش پرەزيدەنتى دونالد ترامپپەن تەلەفون ارقىلى سويلەسكەننەن كەيىن «اتىستى توقتاتۋ جانە قاقتىعىستى رەتتەۋ پرينتسيپتەرىن قامتيتىن بولاشاق بەيبىت كەلىسىمنىڭ نەگىزىن قالاۋ ءۇشىن ۋكراينامەن مەموراندۋم جاساۋعا دايىن ەكەنىن» ايتتى.