اقمولا وبلىسىنىڭ جاس دارىندارى بىشكەكتەگى حالىقارالىق بايقاۋدا توپ جاردى

بۇلاندى اۋدانىنىڭ وقۋشىلارى بىشكەكتە وتكەن «ءبىز — XXI عاسىر زياتكەرلەرىمىز» اتتى حالىقارالىق بايقاۋدا قازاقستاننىڭ نامىسىن ابىرويمەن قورعاپ قايتتى. بۇل شارا جىل سايىن وننان استام ەلدەن كەلگەن دارىندى جاستاردى جينايدى. بيىل ۇزدىكتەر قاتارىنان ماكينسك قالاسىنداعى مەكتەپ-گيمنازيانىڭ وقۋشىسى اننا پەتروۆسكايا مەن نيكولسكوە اۋىلىنىڭ №2 مەكتەبىنىڭ وقۋشىسى ءاسانالى ءاشىموۆ كورىندى. ەكەۋى دە III دارەجەلى ديپلوم يەگەرى اتاندى. جاس ونەرتاپقىشتاردىڭ جەتەكشىسى — ارتيوم تسيمبال. ول بىرنەشە جىلدان بەرى وقۋشىلاردىڭ حالىقارالىق دەڭگەيدە جەتىستىككە جەتۋىنە جول اشىپ كەلەدى. ونىڭ شاكىرتتەرى ءتۇرلى بەدەلدى بايقاۋلاردىڭ جۇلدەگەرى اتانىپ ءجۇر. ءاسانالى ءاشىموۆ بايقاۋعا «ك-700ا تراكتورى» اتتى ستەندتىك ۇلگى دايىنداپ، ينجەنەرلىك ناقتىلىعى مەن شىعارماشىلىق شەشىمى ءۇشىن قازىلار القاسىنىڭ جوعارى باعاسىنا يە بولدى. ال اننا پەتروۆسكايا «روبوتوتەحنيكا جانە اۆتوماتتاندىرىلعان جۇيەلەر» نوميناتسياسىندا ستوماتولوگيالىق جۇمىستارعا ارنالعان ەرەكشە مانيپۋلياتور-روبوتىن تانىستىردى. ونىڭ جوباسى ءوزىنىڭ پراكتيكالىق ءمانى مەن بىرەگەيلىگىمەن مامانداردىڭ قىزىعۋشىلىعىن تۋدىردى. بۇل جەڭىس — تاباندى دايىندىقتىڭ، وقۋشىلاردىڭ قىزىعۋشىلىعى مەن ۇستازدارىنىڭ قولداۋىنىڭ جەمىسى. مۇنداي جەتىستىكتەر ءوڭىر جاستارىنىڭ الەۋەتىن دالەلدەپ قانا قويماي، ولاردىڭ قاتارلاستارىنا دا عىلىم مەن تەحنيكا سالاسىنداعى ىزدەنىستەرگە جول اشادى.