ءماجىلىس دەپۋتاتى باقىتجان بازاربەك سارا نازارباەۆا قايتىس بولدى دەگەن اقپاراتقا بايلانىستى ءوز پىكىرىن ءبىلدىردى، دەپ حابارلايدى «ادىرنا» ءتىلشىسى Ertenmedia-عا سىلتەمە جاساپ.
«جالپى، تۇسىنىكسىز وقيعا بولدى. ءيا، بۇرىنعى پرەزيدەنتتىڭ ايەلى بولسا دا، ول دا ادام عوي. بۇل جەردە نە قۇپيا بار؟ ەگەر ادام قايتىس بولسا، ونى انىق ءارى اشىق حابارلاۋىمىز كەرەك. ەگەر امان بولسا، ونى دا جاسىرماي جاريا ەتۋ كەرەك. قۇزىرلى ورگاندار حالىق الدىنا شىعىپ، ناقتى مالىمەتتى نەگە بەرمەيدى؟ نەگە سارا الپىسقىزىنىڭ ءوزى حالىق الدىنا شىعىپ، امان-ەسەن ەكەنىن كورسەتپەيدى؟ بۇل جەردە تۇسىنىكسىز نارسە كوپ»، – دەدى ول.
دەپۋتات قازاقستاندا ەشبىر ازامات تۋرالى، ونىڭ قوعامداعى مارتەبەسىنە قاراماي، اقپارات جاسىرۋعا بولمايتىنىن مالىمدەدى. ايتۋىنشا، الدەبىرەۋلەردىڭ اقيقاتتى بۇركەمەلەۋگە تىرىسىپ جاتقانى بايقالادى.
«ءسىرا، وسى مالىمەتتى جاريا ەتكىسى كەلمەيتىن الدەبىر ىقپالدى كۇشتەر بار سياقتى. ولار قانداي ماقسات كوزدەپ وتىر، نەگە شىندىقتى جاسىرعىسى كەلەدى، تۇسىنە الار ەمەسپىن. ەگەر ادام شىنىمەن ءتىرى بولسا، ەل الدىنا شىعىپ، حال-جاعدايىن ايتۋى كەرەك قوي. ال ءتيىستى ورگاندار سونى راستاپ، رەسمي تۇردە حابارلاسا بولدى. ەگەر ادام ومىردەن وتسە، ول دا زاڭ جۇزىندە بەكىتىلۋى ءتيىس. وسى ماسەلەنىڭ جاسىرىن قالعانى دۇرىس ەمەس، بۇل قالىپتى جاعدايعا جاتپايدى»، – دەپ تولىقتىردى دەپۋتات ءوز پىكىرىن.
باقىتجان بازاربەك - سارا نازارباەۆانىڭ ءولىمى تۋرالى الىپ-قاشپا مالىمەتكە بيلىك تارماقتارىنان العاش رەاكتسيا ءبىلدىرىپ وتىرعان دەپۋتات. ەسكە سالا كەتەيىك، 14 مامىر كۇنى سارا نازارباەۆانىڭ قايتىس بولعانى تۋرالى اقپارات تاراعان ەدى. الايدا بۇل اقپاراتتى نۇرسۇلتان نازارباەۆتىڭ ءباسپاسوز حاتشىسى ايدوس ۇكىباي رەسمي تۇردە جوققا شىعاردى. بىرنەشە كۇننەن كەيىن جەلىدە نازارباەۆتار اۋلەتىنە تيەسىشى قورىمدا جاڭا زيرات پايدا بولعانى تۋرالى اقپارات تارادى. جاڭا بەيىت مارقۇم بولات نازارباەۆتىڭ قابىرىنىڭ ءدال جانىندا ورنالاسقان. قابىردە ەشقانداي جازۋ، بەلگى جوق. بۇل جاعداي قوعامدا سارا نازارباەۆانىڭ قايتىس بولعانى تۋرالى بولجامداردى كۇشەيتىپ وتىر.
