Mäjılıs deputaty Baqytjan Bazarbek Sara Nazarbaeva qaitys boldy degen aqparatqa bailanysty öz pıkırın bıldırdı, dep habarlaidy «Adyrna» tılşısı Ertenmedia-ǧa sılteme jasap.
«Jalpy, tüsınıksız oqiǧa boldy. İä, būrynǧy prezidenttıŋ äielı bolsa da, ol da adam ǧoi. Būl jerde ne qūpiia bar? Eger adam qaitys bolsa, ony anyq ärı aşyq habarlauymyz kerek. Eger aman bolsa, ony da jasyrmai jariia etu kerek. Qūzyrly organdar halyq aldyna şyǧyp, naqty mälımettı nege bermeidı? Nege Sara Alpysqyzynyŋ özı halyq aldyna şyǧyp, aman-esen ekenın körsetpeidı? Būl jerde tüsınıksız närse köp», – dedı ol.
Deputat Qazaqstanda eşbır azamat turaly, onyŋ qoǧamdaǧy märtebesıne qaramai, aqparat jasyruǧa bolmaitynyn mälımdedı. Aituynşa, äldebıreulerdıŋ aqiqatty bürkemeleuge tyrysyp jatqany baiqalady.
«Sırä, osy mälımettı jariia etkısı kelmeitın äldebır yqpaldy küşter bar siiaqty. Olar qandai maqsat közdep otyr, nege şyndyqty jasyrǧysy keledı, tüsıne alar emespın. Eger adam şynymen tırı bolsa, el aldyna şyǧyp, hal-jaǧdaiyn aituy kerek qoi. Al tiıstı organdar sony rastap, resmi türde habarlasa boldy. Eger adam ömırden ötse, ol da zaŋ jüzınde bekıtıluı tiıs. Osy mäselenıŋ jasyryn qalǧany dūrys emes, būl qalypty jaǧdaiǧa jatpaidy», – dep tolyqtyrdy deputat öz pıkırın.
Baqytjan Bazarbek - Sara Nazarbaevanyŋ ölımı turaly alyp-qaşpa mälımetke bilık tarmaqtarynan alǧaş reaksiia bıldırıp otyrǧan deputat. Eske sala keteiık, 14 mamyr künı Sara Nazarbaevanyŋ qaitys bolǧany turaly aqparat taraǧan edı. Alaida būl aqparatty Nūrsūltan Nazarbaevtyŋ baspasöz hatşysy Aidos Ükıbai resmi türde joqqa şyǧardy. Bırneşe künnen keiın jelıde Nazarbaevtar äuletıne tiesışı qorymda jaŋa zirat paida bolǧany turaly aqparat tarady. Jaŋa beiıt marqūm Bolat Nazarbaevtyŋ qabırınıŋ däl janynda ornalasqan. Qabırde eşqandai jazu, belgı joq. Būl jaǧdai qoǧamda Sara Nazarbaevanyŋ qaitys bolǧany turaly boljamdardy küşeitıp otyr.
