Eks-prezident Nūrsūltan Nazarbaevtyŋ būrynǧy küieu balasynyŋ aty juyrda jariialanǧan qarjyger Djeffri Epşteinnıŋ hattarynda ataldy, dep habarlaidy «Adyrna» tılşısı.
Azattyq radiosynyŋ habarlauynşa, qūjattarda Rahat Äliev AQŞ-ty panalauǧa jäne şamamen 2 mlrd dollardy qaitaruǧa kömektesudı sūraǧan.
Hattar mazmūnyna qaraǧanda, Äliev 2007–2008 jyldary Qazaqstandaǧy yqpalyn joǧaltqannan keiın Europada jasyrynyp jürgen. Ol özınıŋ aktivterı töŋıregındegı jaǧdaidy paidalanyp, eks-prezident Nazarbaevtyŋ bedelıne nūqsan keltıruge ümıttengen.
Sondai-aq ol Vaşingtonda RJI Government Strategies firmasyn jaldaǧan. Būl kompaniia 20-ǧa juyq kongressmen keŋselerımen bailanys ornatyp, AQŞ zaŋ şyǧaruşylarynyŋ Qazaqstanǧa saparyn ılgerıletken. Firma jariialaǧan materialdarda Äliev «saiasi quǧyn-sürgınnıŋ qūrbany» retınde körsetılgen.
Alaida Obama äkımşılıgı būl jaǧdaiǧa aralaspau turaly şeşım qabyldaǧan. AQŞ-tyŋ Qazaqstandaǧy elşısı Richard Hougland qūpiia jedelhattarynda Äliev te, Qazaqstan bilıgı de AQŞ-ty öz maqsattaryna qoldanuǧa tyrysuda dep eskertken.
Eske salaiyq, Äliev 2007 jyly ūiymdasqan qylmystyq top qūru, adam ūrlyǧyn ūiymdastyru, qaru qoldanu, adam denesıne ärtürlı zaqym keltıru siiaqty bırneşe aiyptaular boiynşa kınälı dep tanylǧan. Sol kezdegı prezident Nūrsūltan Nazarbaevpen kikıljıŋnen soŋ elden qaşyp ketken ol 2008 jyldyŋ 15 qaŋtarynda Almaty qalasy, Almaly audanaralyq sotynyŋ şeşımımen syrttai sottalǧan. Sot Älievtı 20 jylǧa bas bostandyǧynan aiyru jäne dünie-mülkın tärkıleu turaly şeşım şyǧarady. Osy jyly Aqmola äskeri garnizonynda taǧy da syrttai sot prosesı ötıp, Älievtıŋ 20 jylyna taǧy 20 jyl qosyp berıledı. 2008 jyldyŋ 20 säuırınde Nazarbaevtyŋ şeşımımen Älievtıŋ barlyq nagradasynyŋ küşı joiyldy. Sol jyly Avstriia soty Älievtı qamauǧa alyp, keiın 1 million evro kepıldıkpen üi qamaqqa jıberedı.
2014 jyldyŋ jeltoqsanynda Austriia Rahat Älievke ekı bankirdı öltırgenı üşın aiyp taqqan. Ol öz kınäsın moiyndamady. Al 2015 jyly Äliev Avstriia türmesındegı jalǧyz kısılık kameradan ölı tabylǧan. Avstriia bilıgı onyŋ suisidten qaitys bolǧanyn mälımdegen.
