21 مامىر كۇنى الماتى قالاسىندا ورتالىق ازياداعى العاشقى قىتايتانۋ فورۋمى ءوتتى، دەپ حابارلايدى «ادىرنا» ءتىلشىسى.
ءىس-شارادا قىتاي مەن ورتالىق ازيا ەلدەرى اراسىنداعى ديالوگتى نىعايتۋ جانە ايماقتاعى قىتايتانۋ عىلىمىنىڭ دامۋ ۇردىستەرى مەن بولاشاعىن تالقىلاۋ ماسەلەلەرى كوتەرىلدى.
سەنات توراعاسى ماۋلەن اشىمباەۆ فورۋمعا جولداعان قۇتتىقتاۋ حاتىندا قىتايدىڭ قازاقستان ءۇشىن ورتالىق ازياداعى ماڭىزدى سەرىكتەس ەكەنىن اتاپ ءوتتى. ول قازىرگى ۋاقىتتا ەكى ەل اراسىنداعى قارىم-قاتىناستاردىڭ جاڭا ساپالى دەڭگەيگە كوتەرىلىپ جاتقانىن جەتكىزدى.
ال قىتايدىڭ الماتىداعى باس كونسۋلى تسزيان ۆەي فورۋم بارىسىندا ەكىجاقتى قارىم-قاتىناستاردىڭ كەڭەيۋىن ەرەكشە اتاپ ءوتتى.
«قىتاي مەن قازاقستان – تاتۋ كورشى ءارى سەنىمدى سەرىكتەستەر. گۋمانيتارلىق ىنتىماقتاستىعىمىز بەلسەندى دامىپ كەلەدى. قازىر قازاقستاندىق جاستاردىڭ قىتايدا ءبىلىم الۋعا قىزىعۋشىلىعى ارتىپ وتىر، سونىمەن قاتار قىتاي تىلىنە دەگەن قىزىعۋشىلىق قازاقستاندا دا تۇراقتى وسۋدە»،—دەدى ول.
الماتى قالاسىنداعى قىتايتانۋشىلار قاۋىمداستىعىنىڭ ءتورايىمى دينارا داۋەن قىتاي مەن ورتالىق ازيا اراسىنداعى ءوزارا ارەكەتتەستىكتىڭ تەرەڭ ءارى مازمۇندى بولۋى ءۇشىن ءوزارا تۇسىنىستىكتى ارتتىرۋدىڭ ماڭىزدىلىعىنا توقتالدى.
فورۋمعا قازاقستان، قىرعىزستان، وزبەكستان جانە تاجىكستاننان كەلگەن قىتايتانۋشىلار، عالىمدار مەن ساراپشىلار، سونداي-اق قىتايدىڭ ۋنيۆەرسيتەتتەرى مەن زەرتتەۋ ورتالىقتارىنىڭ وكىلدەرى قاتىستى.
قاتىسۋشىلار ورتالىق ازياداعى قىتايتانۋ عىلىمىنىڭ قازىرگى جاعدايى مەن دامۋ پەرسپەكتيۆالارىن، قىتاي مەن ايماق ەلدەرى اراسىنداعى ىنتىماقتاستىقتاعى قىتايتانۋدىڭ ءرولىن، قىتاي ءتىلىن وقىتۋ مەن ۇيرەنۋ ماسەلەلەرىن، سونداي-اق ايماقتاعى قىتاي ءتىلى مەن ادەبيەتىنىڭ دامۋىن تالقىلادى.
فورۋم قىتاي مەن ورتالىق ازيا ەلدەرى اراسىنداعى عىلىمي جانە مادەني بايلانىستاردى نىعايتۋعا باعىتتالعان ماڭىزدى قادام بولدى.
