ەلىمىزدە بالالاردىڭ تەرەزەدەن قۇلاۋ وقيعالارى جيىلەپ كەتتى. جىل باسىنان بەرى ستراتەگيالىق جوسپارلاۋ جانە جەدەل باسقارۋ كوماندالىق ورتالىعىنا بالالاردىڭ تەرەزەدەن قۇلاۋىنا بايلانىستى 60 جازاتايىم وقيعا تۋرالى اقپارات تۇسكەن، دەپ حابارلايدى
بەس بالا وقيعا ورنىندا قازا تاپسا، 55 بالا ءتۇرلى جاراقات الىپ، مەديتسينالىق مەكەمەلەرگە جەتكىزىلگەن.
21 مامىردا قاراعاندى قالاسىندا كوپقاباتتى ۇيلەردىڭ بىرىندە 7-قاباتتان ەكى جاسار ءسابي قۇلاپ ءتۇستى. قالالىق تجد مالىمەتىنشە، بالا وقيعا ورنىندا كوز جۇمعان. ءدال وسى كۇنى پاۆلودار قالاسىندا دا بەس جاسار بالا اشىق تۇرعان تەرەزەدەن قۇلاپ كەتتى. قازىرگى تاڭدا قىز تراۆماتولوگيا بولىمشەسىنە جاتقىزىلىپ، ەم قابىلداپ جاتتى.
توتەنشە جاعدايلار مينيسترلىگى جىلى مەزگىلدىڭ باستالۋىمەن، سونىمەن قاتار جازعى مەكتەپ دەمالىسى كەزىندە جىل سايىن وسىنداي وقيعالار سانى ارتاتىنىن مالىمدەدى.
مينيسترلىك مالىمەتىنشە، بىلتىر وسىنداي 196 وقيعا تىركەلگەن.
ەسكە سالايىق، بۇعان دەيىن پاۆلوداردا 3-قاباتتىڭ تەرەزەسىنەن قۇلاپ قازا تاپقان 3 جاسار ءبۇلدىرشىننىڭ اناسى بەس جىلعا باس بوستاندىعىنان ايىرىلۋى مۇمكىن ەكەنىن ايتقان ەدىك. ول بالانىڭ قاۋىپسىزدىگىنە اسا ءمان بەرمەگەنى ءۇشىن ايىپتالىپ وتىر.
«بالالاردىڭ ءومىرى مەن دەنساۋلىعىنىڭ قاۋىپسىزدىگىن قامتاماسىز ەتۋ جونىندەگى مىندەتتەردى تيىسىنشە ورىنداماۋ (قك-ءنىڭ 141-بابى، 2-بولىگى) فاكتىسى بويىنشا قىلمىستىق ءىس قوزعالدى. قايعىلى وقيعا كەزىندە بالالار ۇيدە جالعىز بولعانى انىقتالدى. قازىر بولعان وقيعانىڭ بارلىق ءمان-جايىن انىقتاۋ ءۇشىن تەرگەۋ ءىس-شارالارىنىڭ كەشەنى جۇرگىزىلىپ جاتىر»،—دەپ ءتۇسىندىردى وبلىستىق پوليتسيا دەپارتامەنتىنىڭ ءباسپاسوز قىزمەتى.
