22 مامىر كۇنى تاڭەرتەڭ كاليفورنيا شتاتىنىڭ سان-ديەگو قالاسىنداعى اۋدانداردىڭ بىرىنە Cessna 550 ۇلگىسىندەگى جەڭىل موتورلى ۇشاق قۇلادى. وقيعا سالدارىنان ءورت تۇتانىپ، بىرنەشە ءۇي مەن ونداعان كولىككە زاقىم كەلدى. بۇل تۋرالى جەرگىلىكتى بيلىك پەن قۇتقارۋ قىزمەتتەرى مالىمدەدى، دەپ حابارلايدى “ادىرنا” ۇلتتىق پورتالى ۆۆس-گە سىلتەپ.
سان-ديەگو پوليتسياسىنىڭ مالىمەتىنشە، قازىرگە دەيىن ەكى ادامنىڭ قايتىس بولعانى راستالدى. جەرگىلىكتى Sound Talent Group مۋزىكالىق كومپانياسى ۇشاقتا ولاردىڭ ءۇش قىزمەتكەرى – مۋزىكالىق اگەنت دەيۆ شاپيرو جانە اتى-ءجونى جاريالانباعان ەكى ارىپتەسى بولعانىن مالىمدەدى.
اقش-تىڭ ازاماتتىق اۆياتسيا فەدەرالدى باسقارماسى ۇشاق بورتىندا التى ادام بولعانىن حابارلادى.
پوليتسيا ۇشاق قۇلاعان جەردە جەرگىلىكتى تۇرعىندار اراسىندا اۋىر جاراقات العاندار جوق ەكەنىن ناقتىلادى. ءبىر ادام اۋرۋحاناعا جەتكىزىلگەن، قالعاندارىنا وقيعا ورنىندا مەديتسينالىق كومەك كورسەتىلگەن. جول اپاتىنان 10 ءۇي زاقىمدانعان، بىرەۋى تولىعىمەن قيراعان.
سان-ديەگو ءورت ءسوندىرۋ قىزمەتى باستىعىنىڭ ورىنباسارى دەن ەددي مالىمدەگەندەي، ۇشاقتىڭ قالدىقتارى كەڭ اۋماققا شاشىلعان. ۇشاق قۇلاعان كوشە بويىمەن 400 مەترگە دەيىن بارلىق كولىكتەر جانىپ كەتكەن.
وقيعا بولعان ساتتە اۋا رايى تۇماندى بولعان. ۇشاق سان-ديەگوداعى مەرفي-كەنيون اۋدانىندا قۇلاعان. بۇل اۋداندا نەگىزىنەن اسكەري قىزمەتشىلەردىڭ وتباسى تۇرادى. مۇندا شامامەن 9600 ادام بار. جاقىن ماڭدا بىرنەشە اسكەري بازا ورنالاسقان.
بيلىك بىرنەشە كۆارتالدىڭ تۇرعىندارىن ەۆاكۋاتسيالادى – بارلىعى 100-گە جۋىق ادام.
دەن ەددي ۇشاقتىڭ Montgomery Field اۋەجايىنا باعىت العان بولۋى مۇمكىن ەكەنىن ايتتى.
سان-ديەگو قالاسىنداعى اسكەري-تەڭىز بازاسىنىڭ قولباسشىسى بوب حيلي بۇل اۋدان الەمدەگى ەڭ ءىرى اسكەري قونىستاردىڭ ءبىرى ەكەنىن اتاپ ءوتىپ، وقيعادا زارداپ شەككەندەردىڭ بارلىعىنا كوڭىل ايتتى.
