تالدىقورعان قالاسىندا قوناقۇيلەردىڭ بىرىنەن 12 جەردەن پىشاق جاراقاتىن العان اكىمشى ايەلدىڭ ءمايىتى تابىلدى، دەپ حابارلايدى "ادىرنا" ۇلتتىق پورتالى.
مارقۇمنىڭ دەنەسى قوناقۇيدىڭ ءبىرىنشى قاباتىنداعى ءورتتى ءسوندىرۋ كەزىندە انىقتالعان. بولجامداردىڭ بىرىنە سايكەس، قىلمىسكەر ءىزىن جاسىرۋ ماقساتىندا ءورت قويعان بولۋى مۇمكىن.
«24 مامىر كۇنى ساعات 04:14-تە Paradise Villa قوناقۇيىنىڭ قابىلداۋ بولىمىندە ءورت شىقتى. جالىن 20 شارشى مەتر اۋماقتى شارپىدى. ساعات 04:29-دا ءورت تولىق ءسوندىرىلىپ، 35 ادام ەۆاكۋاتسيالاندى»، – دەپ حابارلادى جەتىسۋ وبلىسى تجد.
پوليتسيا بۇل دەرەككە قاتىستى كىسى ءولتىرۋ بابى بويىنشا قىلمىستىق ءىس قوزعالعانىن مالىمدەدى. كۇدىكتى ۇستالعان.
«جەدەل-ىزدەستىرۋ شارالارى بارىسىندا 23 جاستاعى كۇدىكتى ءىزىن سۋىتپاي ۇستالىپ، قاماۋعا الىندى. قازىر تەرگەۋ امالدارى جۇرگىزىلىپ جاتىر. تەرگەۋ مۇددەسىنە بايلانىستى وزگە اقپارات جاريا ەتىلمەيدى»، – دەپ مالىمدەدى جەتىسۋ وبلىستىق پد.
