الماتى وبلىسىندا ورنالاسقان «ازيااگروفۋد» قۇراما جەم زاۋىتى اۋماعىندا ۇن توزاڭىنىڭ جارىلۋىنىڭ سالدارىنان ەكىنشى ادام قازا تاپتى، دەپ حابارلايدى “ادىرنا” ۇلتتىق پورتالى.
اقپاراتقا سايكەس، ەكەۋى دە اۋرۋحانادا العان جاراقاتتارىنان كوز جۇمعان. تاعى ەكى ادامنىڭ جاعدايى اۋىر.
26 مامىر كۇنى الماتى وبلىسى تجد-نە قاراساي اۋدانى جىبەك جولى اۋىلىندا ورنالاسقان ۇن ونىمدەرىن شىعاراتىن تسەح اۋماعىندا جارىلىس بولىپ، ودان كەيىن ءورت شىققانى تۋرالى حابار تۇسكەن. ءورت ءداندى داقىل قالدىقتارىنىڭ شاڭ-اۋا قوسپاسىنىڭ جارىلۋىنان ەكىنشى ەلەۆاتوردىڭ توعىز قاباتتى عيماراتىنىڭ ءبىرىنشى قاباتىندا ورىن العان.
“وقيعا ورنىنا الماتى وبلىسى تجد كۇشتەرى مەن قۇرالدارى شۇعىل تۇردە جىبەرىلدى. وقيعا ورنىنا جەتكەن كەزدە قاتتى تۇتىندەۋ تىركەلدى. جەدەل شتاب قۇرىلىپ، ءتورت جاۋىنگەرلىك بولىمشە جۇمىسقا كىرىستى. قابىلدانعان شارالاردىڭ ارقاسىندا ءورت تولىق ءسوندىرىلدى. ءورتتىڭ جالپى اۋماعى 1377 شارشى مەتردى قۇرادى”، – دەپ حابارلادى تجد.
زارداپ شەككەندەرگە تجد مامانى تاراپىنان پسيحولوگيالىق كومەك كورسەتىلۋدە.
جارىلىس بولعان زاۋىت باسشىلىعى ىشكى تەكسەرۋ جۇمىستارىن باستاعان.
"كومپانيا قىزمەتكەرلەرىنىڭ دەنساۋلىعىنا شىن جۇرەكتەن الاڭدايدى جانە زارداپ شەككەندەر مەن ولاردىڭ وتباسىلارىمەن تۇراقتى بايلانىستا", – دەلىنگەن حابارلامادا.
