ساياساتتانۋشى مارات شيبۇتوۆ Telegram-ارناسىندا «وتانداستار» قورىنىڭ باسقارۋشى ديرەكتورىنا رەسەي فەدەراتسياسىنا 50 جىل مەرزىمگە كىرۋگە تىيىم سالىنعانىن جازدى، دەپ حابارلايدى "ادىرنا" ۇلتتىق پورتالى.
شەكتەۋ 2023 جىلى ەنگىزىلگەنىمەن بۇل اقپارات كوپشىلىككە العاش رەت جاريا ەتىلىپ وتىر.
مارات شيبۇتوۆتىڭ مالىمەتىنشە، قور — قازاقستان رەسپۋبليكاسى سىرتقى ىستەر مينيسترلىگىنە قاراستى ەنشىلەس ۇيىم، ياعني مەملەكەتتىك قۇرىلىم. ول شەتەلدەگى، اسىرەسە رەسەيدىڭ استراحان، ومبى، ورىنبور سەكىلدى شەكارالاس ايماقتارىنداعى ەتنيكالىق قازاقتاردى قولداۋمەن اينالىسادى. قور قىزمەتكەرلەرى گۋمانيتارلىق كومەك كورسەتىپ، قازاق ادەبيەتىن تاراتادى، ءتىلدى وقىتۋعا جانە مادەني بايلانىستاردى نىعايتۋعا اتسالىسىپ كەلەدى.
الايدا قازىر قور جەتەكشىلىگىنىڭ رەسەيگە بارۋىنا تىيىم سالىنۋى – بۇل جۇمىسقا ۇلكەن كەدەرگى كەلتىرىپ وتىر. «بۇدان بىلاي رەسەيدەگى قانداستارعا كىم بارادى؟ ءتىلدى، مادەني جوبالاردى كىم جالعاستىرادى؟» – دەپ الاڭداۋشىلىق ءبىلدىردى ساياساتتانۋشى.
سونىمەن قاتار، شيبۇتوۆ سىرتقى ىستەر مينيسترلىگىنىڭ ۇنسىزدىگىن سىناپ، قوردىڭ ديرەكتورلار كەڭەسىنىڭ توراعاسى، ۆيتسە-مينيستر رومان ۆاسيلەنكوعا جانە مينيستر مۇرات نۇرتىلەۋگە بۇل ماسەلە بويىنشا رەسەيلىك تاراپپەن سويلەستى مە دەگەن ساۋال قويدى.
مامانداردىڭ پىكىرىنشە، مۇنداي تىيىم – قازاقستاننىڭ رەسەيدەگى گۋمانيتارلىق جانە مادەني ساياساتىنا ىقپال ەتۋى مۇمكىن ماڭىزدى ديپلوماتيالىق وقيعا.
