28 مامىر كۇنى Reuters اگەنتتىگى رەسەي پرەزيدەنتى ۆلاديمير ءپۋتيننىڭ ۋكرايناعا قارسى سوعىستى توقتاتۋ ءۇشىن قويعان شارتتارىن جاريا ەتتى، دەپ حابارلايدى "ادىرنا" ۇلتتىق پورتالى.
اگەنتتىك دەرەكتەرىنە سايكەس، پۋتين باتىس ەلدەرىنىڭ باسشىلارىنان ناتو-نىڭ شىعىسقا قاراي كەڭەيۋىن توقتاتۋ جانە رەسەيگە سالىنعان كەيبىر سانكتسيالاردى الىپ تاستاۋ تۋرالى جازباشا كەپىلدىك تالاپ ەتىپ وتىر.
ءپۋتيننىڭ بۇل ۇسىنىستارى اياسىندا ۋكراينا، گرۋزيا، مولدوۆا جانە باسقا دا بۇرىنعى كەڭەس وداعى ەلدەرىنىڭ ناتو-عا مۇشە بولۋىن رەسمي تۇردە بولدىرماۋ، ۋكراينانىڭ بەيتاراپ مارتەبەسىن زاڭداستىرۋ، سونداي-اق ەلدەگى ءورىستىلدى حالىقتىڭ قۇقىقتارىن قورعاۋ ماسەلەلەرى قامتىلعان. سونىمەن قاتار، رەسەي باسشىسى ورتالىق بانكتىڭ قاتىپ قالعان اكتيۆتەرى بويىنشا دا ماسەلە كوتەرۋدە.
Reuters دەرەككوزدەرىنىڭ ءبىرى كرەملدىڭ ەكونوميكالىق قيىندىقتارعا قاراماستان، سوعىستى جىلدار بويى جالعاستىرا الاتىنىن ايتادى. ەگەر پۋتين ءوز شارتتارىمەن كەلىسىمگە قول جەتكىزە الماسا، ول ۋكراينا ءۇشىن بولاشاقتىڭ بۇدان دا اۋىر بولاتىنىن كورسەتۋدى ماقسات ەتەدى، دەلىنگەن حابارلامادا.
وسى جاعدايعا بايلانىستى امەريكالىق Politico باسىلىمى اقش پرەزيدەنتى دونالد ترامپتىڭ پۋتينگە قاتىستى كوزقاراسى تۋرالى اقپارات تاراتتى. باسىلىم مالىمەتىنشە، ترامپ پۋتينگە قاتىستى ازىرگە ناقتى شەشىم قابىلداماعان.
اقش اكىمشىلىگىندەگى دەرەككوزدەر ترامپتىڭ سوڭعى كۇندەرى پۋتينگە قاتىستى "ەسىنەن اداسقان", "وتپەن ويناپ ءجۇر" دەگەن سياقتى قاتاڭ مالىمدەمەلەر جاساعانىن العا تارتادى. Politico حابارلاۋىنشا، اقش پرەزيدەنتى رەسەيدىڭ ۋكرايناعا شابۋىلدارىن كۇشەيتۋىنە جاۋاپ رەتىندە قوسىمشا سانكتسيالار ەنگىزۋ تۋرالى شەشىم قابىلداۋ الدىندا تۇر.
بىرقاتار اقش شەنەۋنىكتەرى سانكتسيالاردىڭ امەريكالىق ەكونوميكاعا زيان تيگىزۋى مۇمكىن ەكەنىن ايتىپ، ساق بولۋعا شاقىرسا، كونگرەسستەگى رەسپۋبليكاشىلدار، اسىرەسە سەنات كوشباسشىلارى، سانكتسيالاردى كۇشەيتۋدى قولدايتىنىن ءبىلدىردى.
